Wednesday, August 31, 2011

+ 2 മതിയായില്ല ! ഒരു + 5 എങ്കിലും വേണ്ടിയിരുന്നു !!

കോക്കല്ലൂർ പ്ലസ്-ടു വിനെ കുറിച്ച് വെറുതെ അങ്ങ് പറഞ്ഞ് തുടങ്ങിയാൽ എന്തിലും നന്മ മാത്രം ദർശിക്കുന്ന ദോഷൈക ദൃക്കുകൾക്ക് സങ്കടം വരുമെന്നതിനാൽ ഒരു ഭയങ്കര സത്യം വെളിപ്പെടുത്തിക്കൊണ്ട് ആരംഭിക്കാം..അത് ഇപ്രകാരമാകുന്നു ; കേരളത്തിലെ ആദ്യ 10 പ്ലസ്-ടു കളിൽ ഒന്നാകുന്നു കോക്കല്ലൂർ !! വ്യക്തിപരമായി പറയുകയാണെങ്കിൽ വിദ്യാർത്ഥി ജീവിതത്തിലെ ഒരു സുവർണ്ണ കാലഘട്ടം...ഒരു തെറിച്ച ഘട്ടമെന്ന് കൂട്ടിച്ചേർത്താൽ തെറ്റില്ല..
ആൺകുട്ടികൾക്കില്ലാത്ത എന്തൊക്കെയോ അതിമനോഹരമായ കഴിവുകൾ പെൺകുട്ടികൾക്ക് ഉണ്ടെന്ന് തോന്നിയതും ഇവിടെ വച്ച്..
പുക ആദ്യമായി പേടിയില്ലാതെ ആസ്വദിച്ച് വലിച്ചതും,പാൻ പരാഗിന്റെ എരിവും ഹൻസിന്റെ മഞ്ഞയും തലയിൽ കയറിയതും ഇവിടെ വച്ച്..ഒപ്പം വടകര സിഫി ഷോപ്പേസ് ഷോപ്പിന്റെ ഉത്ഘാടനത്തിനു അച്ഛൻ വാങ്ങിത്തന്ന കരുത്ത ടീ ഷർട്ട് ഇട്ട് കൊണ്ടെടുത്ത ചിത്രം മാതൃഭൂമിയിലും മാധ്യമത്തിലും മനോരമയിലും ജില്ലാതല കാർട്ടൂൺ മത്സരത്തിൽ ഒന്നാം സ്ഥാനം കിട്ടിയ വാർത്തയുമായി വന്നതും ഇവിടെ വച്ച് ! ഇനി ഈ പായാരം ഇപ്പോൾ തികട്ടി വന്നതിന്റെ കാരണം പറയാം..അവിടം വിട്ട് പോയവരെ ഇനി കാണുമെന്ന് വലിയ പ്രതീക്ഷ ഒന്നുമില്ലായിരുന്നു, പക്ഷെ കാലം ചില അത്ഭുതങ്ങൾ കാണിക്കാറുണ്ടല്ലോ..അങ്ങനെ വർഷങ്ങൾക്ക് ശേഷം ഈ വെർച്വൽ ലോകത്ത് ഒരു ഗെറ്റ് റ്റുഗതർ! 
ലോകത്തിന്റെ പല കോണുകളിലേക്ക് പറന്ന് പോയവർ..കാലം നാടുമായി ചങ്ങലക്കിട്ടവർ...കാടും മലയും താണ്ടി നാടിനു കാവലിരിക്കുന്നവർ..ഡോക്ടർമാരും നഴ്സുമാരും..ആനിമേറ്റർമാരും ആർടിസ്റ്റുകളും..വിദേശികളെ നാണിപ്പിക്കുന്ന സോഫ്റ്റ് വെയർ വിദഗ്ദർ..പര്യവേഷകർ..ഉന്നത ഉദ്യോഗസ്ഥർ..സ്വന്തം സ്ഥാപനങ്ങൾ നടത്തുന്നവർ..അങ്ങനെ ഒരു കൂട്ടം !! 
അതിൽ ആദ്യമായി എന്റെ ചിത്രം വരച്ച് തന്ന ദീഷ്മ മുരളീധരനും,.ഈ പോസ്റ്റ് എഴുതാൻ നിർബന്ധിച്ച് ചീത്ത വിളിച്ച ഷിറാസ് അബ്ദുൾ ഖാദറും, മൈസൂരിലെ അപരിചിതമായ ചുറ്റുപാടിൽ ജീ മെയിലിൽ ആശ്വാസവാക്കുകൾ പറഞ്ഞ് കൂട്ടുകൂടാൻ മനസ്സ് കാണിച്ച നമിതയും, യൂ.പി സ്കൂൾ മുതൽ പ്ലസ് ടു വരെ ഒപ്പമുണ്ടായിരുന്ന പെൻസിൽ എന്ന് ഞാൻ വിളിച്ച് പോന്ന രംഷിലും ഉൾപ്പെടുന്നു..ഒരു പട്ടാളക്കാരന്റെ മുഖമുണ്ടായിരുന്ന ആനന്ദ് ഇൻഷുറൻസ് വിദഗ്ദനായതും ഒരു ഇൻഷുറൻസ് വിദഗ്ദന്റെ മുഖമുണ്ടായിരുന്ന സാഗേഷ് ഒരു പട്ടാളക്കാരനായതും ഇതേ കാലത്തിന്റെ കളി !

ധനേഷിന്റെയും (ഇനി മുതൽ മണ്ടം കുളം എന്ന് വിളിക്കപ്പെടും ) എന്റെയും,പ്രഭീഷിന്റെയും ( ധ്യാന നിരതനായി ഇരുന്ന് ഒരു വിജയൻ മാഷിനും പിടികൊടുക്കാതെ ഉറക്കം തൂങ്ങാനുള്ള സവിശേഷ കഴിവ് ഉണ്ടായിരുന്നതിനാൽ ടിയാൻ പ്രഭുവാനന്ദ സ്വാമികൾ എന്ന് അറിയപ്പെട്ടു ) എല്ലാം സ്വകാര്യ അഹംകാരമായിരുന്നു സുഷിത എന്ന പൂച്ചക്കണ്ണി !! ലവൾ ഞങ്ങളുടെ ക്ലാസ്സിലേക്ക് അന്താരാഷ്ട്ര ശ്രദ്ധ ( എന്ന് വച്ചാൽ ‘എ’ , ‘ബി’ ഡിവിഷനുകളിലെ കുറുക്കന്മാരുടെ ശ്രദ്ധ ) തിരിയുന്നതിനു കാരണമായി.. അവളുടെ ഒരു കടാക്ഷത്തിനായി ഞങ്ങൾ...ഛെ അല്ലെങ്കിൽ ഞാൻ ഇല്ല..സോ ഒന്ന് കൂടെ വായിക്കുക അവളുടെ ഒരു കടാക്ഷത്തിനായി അത്യാവശ്യം ഇളക്കമുള്ള സകല പ്രമാണിമാരും പല പല വീര പ്രവർത്തനങ്ങളിൽ ഏർപ്പെട്ട് കൊണ്ടിരുന്നു..അവൾ വരുന്നില്ലെന്ന് കേട്ട് ടൂറിനു നൽകിയ പേരു പോലും പിൻ വലിച്ച് ഫിൽ ഇൻ ദി ബ്ലാങ്ക് എന്ന ചേലിലുള്ള കുറ്റിത്താടിയും നീട്ടി നടന്നവന്മാർ ഉണ്ട് ! ഒരിക്കൽ കെമിസ്ട്രി പ്രാക്ടിക്കലിനു തീപ്പെട്ടി എടുക്കാൻ മറന്ന് പോയത് അവൾ ഒന്ന് ‘സ്റ്റാറ്റസ്’ ഇട്ടതിന്റെ ഏഴാം മിനുറ്റിൽ ഷിബുവേട്ടന്റെ പീടികയിലെ ഏതാണ്ട് മുഴുവൻ തീപ്പെട്ടികളുമവളുടെ ഡെസ്കിലെത്തിയെന്ന് ഐതിഹ്യം ! അതിനായുള്ള മഹായജ്ഞത്തിനിടെ ഒൻപതടി ഉയരമുള്ള സ്കൂൾ മതിൽ ചാടി കാൽക്കുഴ ഉളുക്കിയ ഉളുപ്പില്ലാത്തവന്മാർ കൂട്ടമായി ലീവ് എടുത്തതോടെ പിറ്റേന്ന് ക്ലാസ് പ്രതിസന്ധിയിലാകുകയും ഉച്ചക്ക് ശേഷം അവധി പ്രഖ്യാപിക്കുകയും ചെയ്തത് ഒരു നേയ്ക്കഡ് സത്യം !! 
പ്രസ്തുത പൂച്ചക്കണ്ണിയുടെ അന്താരാഷ്ട്ര ആരാധകരിൽ അഗ്ര ഗണ്യനായിരുന്നു ശ്രീമാൻ ഷിറാസ് അബ്ദുൽഖാദർ എന്ന മാഹിക്കാരൻ..ഇവനെ ആദ്യമായി ശ്രദ്ധിക്കുന്നത് ഒന്നാം വർഷത്തെ ഓണ പരീക്ഷയുടെ പേപ്പറുമായി വന്ന ബാലൻ മാഷ് ഒരു കാര്യം പറഞ്ഞപ്പോഴാണു.. എല്ലാരും മാർക്ക് മോഹിച്ച് വൈലോപ്പിള്ളിയുടെ കന്നിക്കൊയ്ത്തിനെ ‘അങ്ങനെത്തന്നെ അങ്ങനെ തന്നെ’ എന്ന ലൈനിൽ പ്രശംസിച്ച് സോപ്പിട്ടെഴുതിയിട്ടും പരമാവധി 110 മാർക്ക് കിട്ടിയപ്പോൾ കന്നിക്കൊയ്ത്തിലെ നായിക കാണിച്ചത് ചെറ്റത്തരമാണെന്നും കാമുകനെ വിട്ട് ‘മറ്റേതോ നാട്ടിൽ പോയി ആനന്ദം നാട്ടി’യത് ശരിയായില്ലെന്നും പൊളിച്ചെഴുതിയ ഷിറാസിനു ബാലൻ മാഷ് കൊടുത്തത് 120 മാർക്ക് !! അതെന്തായാലും കോക്കല്ലൂർ വിട്ട് അധികം വൈകാതെ, കൃത്യമായി പറഞ്ഞാൽ 28-8-2001 നു ഷിറാസിന്റെ മനോഹരമായ മലയാളം കൈപ്പടയിൽ എനിക്ക് ഒരു കത്ത് വന്നു..22-8-2001 നു എഴുതിയ ആ കത്തിൽ അവൻ ഇങ്ങനെ തുടങ്ങുന്നു
.....”സ്നേഹം നിറഞ്ഞ ഗംഗാ സുഖമെന്ന് കരുതുന്നു..ഞാൻ ഇപ്പോൾ മാഹി ഗവ: കോളജിൽ ബി എസ് സി ഫിസിക്സിനു പഠിക്കുന്നു............അങ്ങനെ തുടർന്ന് പോകുന്ന് കത്ത് അവസാനിക്കുന്നത് ഇങ്ങനെ........” 
നിന്റെ ക്ലാസ്സിലെ ആ പൂച്ചക്കണ്ണിയെ എനിക്ക് മറക്കാൻ കഴിയുന്നില്ല..അവൾ ഇപ്പോൾ എവിടെയാ..?”

പ്ലസ്-ടു ജീവിതത്തിലെ ‘സംഭവ ബഹുല’മായ ഏടുകളിൽ ഒന്ന് ലോകപ്രശസ്തമായ പല മനോഹര സിനിമകളും ( പീപ്പിംഗ് ടോം, മാതാഹരി, കിന്നാരത്തുമ്പികൾ,അവളൊരു വസന്തം...എന്നിത്യാദികൾ ) കാണാൻ അവസരമൊരുക്കി തന്ന ‘ ബാലുശ്ശേരി പ്രഭാത്, കൊയിലാണ്ടി ചിത്ര, അമ്പാടി, കാക്കൂർ അനശ്വര,നന്മണ്ട മഞ്ജുഷ തുടങ്ങിയ ടാക്കീസുകളുമായുള്ള ഹൃദയ ബന്ധമാണു...കൂട്ടത്തിൽ പ്രഭാതിനെ ഞങ്ങൾ സ്നേഹത്തോടെ ‘ തറവാട്’ എന്ന് വിളിച്ച് പോന്നു ! 
ഇന്ന് മേൽ‌പ്പറഞ്ഞ ഒറ്റ ടാക്കീസിന്റെയും തറ പോലും അവിടെ എവിടെയും ഇല്ല..(നമ്മുടെ കുട്ടികൾ എത്ര നിർഭാഗ്യവാന്മാർ J ) ഞാനല്ലാതെ വേറെ ഒരാൾ സ്വയം ഭോഗം ചെയ്യുന്ന കാഴ്ച ജീവിതത്തിൽ ഒരേ ഒരു തവണ ആണു കണ്ടിട്ടുള്ളത്..അത് പ്രഭാതിൽ വച്ചാകുന്നു..മാതാഹരിയുടെ ഇടവേളക്ക് മൂത്രമൊഴിക്കാൻ പോയപ്പോൾ ഒരു മദ്ധ്യ വയസ്കൻ കുനിഞ്ഞ് നിന്ന് ഹസ്ത മൈഥുനം ചെയ്യുന്നു ! ഞാൻ മൂത്രമൊഴിക്കാതെ തിരിച്ച് പോയി.

പറിച്ച് കളയാൻ പ്രയാസമുള്ള മറ്റൊരു ഏടാകുന്നു പഠനയാത്ര ! സലീലും, വിശാലും. ഷിറാസും.സിറാജും,മൻസൂറും അഫ്സലും എല്ലാമടങ്ങുന്ന ബി-ഗ്യാങ്, ലിബീഷും,സിബീഷും,ശ്രീകുമാറും എല്ലാമടങ്ങുന്ന എ-ഗ്യാംഗ് , പിന്നെ ഞാനും, മണ്ടംകുളവും, നക്കീരനും ( വിപിൻ ദാസ് എന്ന മാന്യ ദേഹത്തിനെ ഇരട്ടപ്പേരാകുന്നു നക്കീരൻ..ശ്രീ വീരപ്പൻ രാജ്കുമാറിനെ തട്ടി കാട്ടിൽ കൊണ്ടിട്ടതും മധ്യസ്ഥം വഹിക്കാൻ നക്കീരൻ ഗോപാലൻ പോയതും ഈ കാലത്തായിരുന്നു..മീശയും താ‍ടിയും കൂട്ടി ഒട്ടിച്ച് നക്കീരന്റെ കൃതാവ് ഫേമസായിരുന്നു..ഏതാണ്ട് ഈ ഗോപാലന്റെ കൃതാവു പോലെ എന്തോ കാട്ടിക്കൂട്ടി സ്കൂളിൽ ഷൈൻ ചെയ്യാൻ വന്ന വിപിന് ഞങ്ങൾ കനിഞ്ഞ് നൽകിയ പേരാകുന്നു ‘നക്കീരൻ’ ), പാതാളം ശ്രീജിത്തും ( ഊണിനു ശേഷമുള്ള പതിവു പരദൂഷണത്തിനിടെ ഒരു സിനിമാ നടിയുടെ സ്വകാര്യ ഭാഗത്തേക്ക് ചർച്ചിക്കൽ അതിക്രമിച്ചപ്പൊൾ ശ്രീമാൻ ശ്രീജിത്തിനു നാവില ആദ്യം വന്ന ഉപമ ക്രമേണ അവന്റെ ഇരട്ടപ്പേരുമായി – പാതാളം !  ഏതായാലും ആ പേരു വീണത് നന്നായി. ഇപ്പോൾ സാപ്പിൽ വല്യ ഇഞ്ചിനീയറായ അന്നത്തെ നരന്ത് പയ്യൻ എസ് പി ശ്രീജിത്തിനെയും ഇവനെയും മാറിപ്പോകാതിരിക്കാൻ ഈ പേർ ഉപകരിച്ചു.., ) എച്ചുസ്മീ ദിപിൻ എന്ന ക്ലാസ്സിലെ ചിരി അമിട്ട്, ആസ്ഥാന ബുജി ശ്രീമാൻ പ്രത്യുഷ് അവർകൾ എല്ലാം ഉൾപ്പെടുന്ന സി-ഗ്യാംഗ്.. 
എറണാകുളത്തും ഏറ്റുമാനൂരുമൊക്കെയായി രണ്ട് മുഴുവൻ ദിവസങ്ങൾ..രണ്ടാം ദിവസം മറൈൻ ഡ്രൈവിൽ ചെലവിടാനെത്തിയ സായാഹ്നം മറ്റാരു മറന്നാലും മറക്കാത്ത രണ്ട് ആത്മാക്കളുണ്ട്, ഒന്ന് ഈ പായാരം പയ്യനും മറ്റൊന്ന് പേരു വെളിപ്പെടുത്താൻ ആഗ്രഹിക്കാത്ത ധനേഷ് എന്ന സുസ്മേരവദനനായ സംഗീതവിദ്വാനും ! കാര്യം പറയാം..ലവന്റെ ആദ്യ മധുസേവ ! ‘കട്ട’ ഇട്ട 60 രൂപയുമായി അരണ്ട ചുവന്ന വെളിച്ചമുള്ള ബാറിൽ നുഴഞ്ഞ് കയറി ഒരു കുപ്പി ബിയർ വാങ്ങി. പതുങ്ങി പുറത്ത് വന്ന് തുരുക്ക് കടിച്ചൂരി ഫിഫ്റ്റി – ഫിഫ്റ്റി അടിച്ചു. കുപ്പി കടലിലേക്ക് എറിഞ്ഞ് കളഞ്ഞിട്ട് ഡാ നിനക്ക് ഫിറ്റായെന്ന് ഞാനും, ഡാ നിനക്കും ഫിറ്റായെന്ന് അവനും സർട്ടിഫൈ ചെയ്ത ശേഷം കൈയും കോർത്ത് പിടിച്ച് ഗുൽമോഹറിന്റെ ചുവട്ടിൽ ‘അന്താക്ഷരി‘ കളിക്കുന്ന രജീഷ് മാഷിന്റെ മുന്നിലെ ഒരു ടീമിൽ ചേർന്ന് ‘ഷാ’ യിൽ അവസാനിച്ചാൽ ‘ഹാ ‘ യിൽ പാടിത്തുടങ്ങി അലമ്പാക്കി സകല പെൺ കുട്ട്യോളെയും വെറുപ്പിച്ചു..

അന്ന് രാത്രി ഭക്ഷണശേഷം കുട്ടികൾ മെല്ലെ മെല്ലെ ബസ്സിൽ കയറി ഇരിക്കാൻ തുടങ്ങിയപ്പോൾ മണ്ടം കുളവും ഞാനും ബസിന്റെ പിന്നിൽ ഒരു വശത്ത് ചാരി നിന്ന് അരക്കുപ്പി ബിയറിന്റെ ‘മാരകമായ’ കിക്കിൽ ‘ചൊറിച്ച് മല്ലി ‘ കളിക്കുകയായിരുന്നു.
“ഡാ ‘ തല മുട്ടരുത് ; “ – ഞാൻ
“ ഡാ ‘ തലക്ക് നല്ല മുടി ആണല്ലോ ‘ “ – ലവൻ
“ നിങ്ങൾ എന്താ മൂക്ക് റാഞ്ചിയ കളി കളിക്കുന്നത് “
ഞാൻ കണ്ണ് മിഴിച്ച് മണ്ടംകുളത്തിനെ നോക്കി. ലവനെന്താ പെൺ ശബ്ദമോ ? ലവൻ ഇളിച്ച് കൊണ്ട് എന്നെ നോക്കി. അപ്പോൾ ലവനല്ല.! പിന്നെ ആർ ?? ഞങ്ങൾ രണ്ടും ഒരേ ആംഗിളിൽ മേലോട്ട് നോക്കി..അവിടെ 115 വാട്ടിൽ ചിരിച്ച് മുഴുവൻ പല്ലും കാട്ടി ലവൾ, ചാന്ദിനി ! ക്ലാസ്സിലെ ഞങ്ങളുടെ പ്രധാന കൂട്ടുകാരിയും ആരാധികയും ..!!
എസ്കേപ് !!!

15 കാരിയെ പീഡിപ്പിച്ചു, 17 കാരിയെ കയറിപ്പിടിച്ചു..എന്നൊക്കെയുള്ള വാർത്തകൾ വായിച്ച് സങ്കടപ്പെട്ട് വെള്ളമിറക്കുന്ന , ഒരു പീഡനം പോലും നടത്താൻ കഴിയാതെ പോയ വല്യപ്പച്ചന്റെ അവസ്ഥ പോലെ ആയിരുന്നു റാഗിംഗ് വാർത്തകൾ വായിച്ച് മനക്കോട്ടകൾ കെട്ടുന്ന ഞങ്ങളുടേത്..രോഗി ഇച്ഛിച്ചതും വൈദ്യൻ കൽ‌പ്പിച്ചതും ഓൾഡ് മങ്ക് എന്ന് പറഞ്ഞ മാതിരി പ്ലസ് വണ്ണിലേക്ക് ജൂനിയറുമാർ ഇരച്ച് വന്നത് ആയിടെയാണ് !! ഇതിൽ ഏതിനെ പീഡിപ്പിക്കുമെന്ന കൺഫ്യൂഷനിൽ ഞങ്ങളുടെ കണ്ണുകൾ നിറഞ്ഞ് കണ്ണീർ ധാര ധാരയായി ഒഴുകി.. 
പിറ്റേന്ന് അതിൽ സീത എന്ന ഒരു പച്ച മുളകിനെ പീഡിപ്പിച്ച് എനിക്കും ധനേഷിനും പണികിട്ടി,അവളുടെ ദയ കൊണ്ട് അറസ്റ്റ് ഉണ്ടായില്ല..എന്നാൽ അറസ്റ്റ് ഉണ്ടായി ഞങ്ങളെ അല്ല അയൽ‌പ്പക്കത്തെ കൊല കൊമ്പന്മാർ - വിശാൽ, സലീൽ, ഷിറാസാദികൾ ! പുസ്തകമെടുത്ത് പോയ്ക്കോളാൻ വിധി വന്നു.. ഏതായാലും നയ തന്ത്രം പുരോഗമിക്കുകയും പ്രശ്നം പരിഹരിക്കപ്പെടുകയും ചെയ്തു. സംഭവത്തിൽ ആർ നിരപരാധി എന്ന ചോദ്യം ദുരൂഹമായി ഇന്നും അവശേഷിക്കുന്നു..

ഇനി രണ്ട് പാരകൾ അവശേഷിക്കുന്നു..അവ കേവലം പായാരങ്ങൾ അല്ലെന്ന് വായികുമല്ലോ ? ഈ പാര മാഷിനും ടീച്ചർക്കും നീക്കിവച്ചില്ലെങ്കിൽ ‘പായാര’ത്തിന്റെ പേജ് ഉമിത്തീയാകുമെന്ന തോന്നൽ കൂടെ ഉണ്ടെന്ന് കൂട്ടിക്കോ :) വിജയൻ മാഷായിരുന്നു ആദ്യം അവതരിച്ചത്. ഒരു സ്ലോ മോഷൻ ഗാന രംഗം പോലെ മാഷ് ഇന്നും മനസ്സിലുണ്ട്. വെളുത്ത മുണ്ടും ചന്ദന നിറത്തിലുള്ള കുപ്പായവും ഒക്കെയായി..കെമിസ്ട്രിയിൽ ബിരുദമെടുത്ത് ഇംഗ്ലീഷ് മാഷ് ആയ വിജയൻ മാഷിനെ ഞങ്ങളുടെ പൂർവികർ ‘മങ്ങാട്ടച്ചൻ’ എന്ന് വിളിച്ചിരുന്നത്രെ! കണക്ക് പഠിപ്പിക്കാൻ ഇടക്കിടെ എക്കിൾ ശബ്ദം ഉണ്ടാക്കുന്ന രാധാകൃഷ്ണൻ മാഷും, പിന്നെ ചുവന്ന കവിളുകളും, പളുങ്കു കണ്ണുകളുമുള്ള രജീഷ് കുമാറും വന്നു.. മാട്രിക്സും, പ്രോബബിലിറ്റിയും ഒക്കെയായി കണക്കിൽ ശൂന്യ-മസ്തിഷകനായ എന്റെ കരളിൽ പോലും മാഷ് പറ്റിപ്പിടിച്ചു..
ഫിസിക്സ് പഠിപ്പിക്കാൻ അതി സുന്ദരിയായ ഗീത ടീച്ചർ ( പിന്നെ ടീച്ചറുടെ കല്യാണം കഴിഞ്ഞ് ഏറെക്കാലം പാലോറ സ്കൂളിൽ പഠിപ്പിച്ചു, ഇപ്പോഴും ഉണ്ടെന്ന് സംശയം) ടീച്ചർ പ്ലസ് വണ്ണിൽ തങ്ങി നിന്നപ്പോൾ അഥിതികളായി വന്ന ഷിജു രാജ് മാഷും, പ്രദീപ് മാഷും ഘോര ഘോരം ഇക്വേഷനുകൾ ഡെറിവേറ്റ് ചെയ്തോണ്ടിരുന്നു..സുവോളജി പറഞ്ഞ് തന്ന് ആറടി പൊക്കമുള്ള സ്നേഹ നിധിയായ റണ്ണിമാഷ് ഹൃദയത്തിന്റെ നാലറകളിലും തേരാപ്പാര കയറിയിറങ്ങി !! ഇടത് കൈ കൊണ്ട് എഴുതിയും വരച്ചും ഞങ്ങളെ വിസ്മയിപ്പിച്ച ബോട്ടണിയുടെ ബഷീർ മാഷ് പറയുമ്പോൾ ക്ലാസ്സിലെ പ്രധാന ഹൂറിയായ ഫഹ്മിദ പോലും വാ പൊളിച്ചിരുന്നു..മലയാളം പഠിക്കാനുള്ള ആക്രാന്തത്തിൽ ഭോപാലിൽ നിന്ന് വന്ന ബിന്ദുടീച്ചർ എന്റെ ഒത്ത ഡയറിയിൽ ഓട്ടോഗ്രാഫ് എഴുതിയത് 4 മുഴു പേജുകൾ! മലയാളത്തിനു ഞങ്ങളുടെ സ്വന്തം കുഞ്ഞുണ്ണി മാഷായ കൂട്ടാലിടയിലെ ബാലൻ മാഷ്..എല്ല വ്യാഴാഴ്ച്ചയും ലേബർ ഇന്ത്യയുടെ കെട്ടുമായി വരുന്ന ഉണ്ണിക്കൃഷ്ണൻ മാഷ് ഇംഗ്ലീഷിനെ പ്രണയിക്കാൻ ആദ്യമായി ആഹ്വാനം ചെയ്തു..ഒടുവിൽ സാക്ഷാൽ മുരുകൻ മാഷും ! കോക്കല്ലൂരിന്റെയും കൊയിലാണ്ടിയുടെയുമെല്ലാം ഓൾ റൌണ്ടർ ആയിരുന്നു മുരുകൻ മാഷ് ! അസൂയക്കാർ അണ്ണാച്ചിയെന്നൊക്കെ വിളിച്ചപ്പൊൾ കടുകട്ടിയായ കണക്കുകളും, ഫിസിക്സും, ഓർഗാനിക് കെമിസ്ട്രിയുമെല്ലാം ലൈം ജ്യൂസ് പരുവത്തിൽ മാഷിന്റെ ആയ സൂത്രവാക്യങ്ങളിലൂടെ ഓരോ കുട്ടിക്കും പകർന്ന് കൊടുത്ത് അവരുടെ ഹൃദയങ്ങളിൽ ജീവിച്ചു !

ഇനി ഈ ഖണ്ഡിക അവർക്കായി സമർപ്പിക്കുന്നു..ഞങ്ങളിൽ നിന്ന് എന്നെന്നേക്കുമായി അടർന്ന് പോയവർക്കായി..ഒരു യാത്രാമൊഴി പോലും പറയാതെ ഞങ്ങളെ പിരിഞ്ഞുപോയവർക്കായി..റജീനയായിരുന്നു ആദ്യ നഷ്ടം..കറുത്ത പാവാടയും ചന്ദനനിറത്തിലുള്ള മുഴു കൈ കുപ്പായവും കറുത്ത തട്ടവും ഇട്ട് വന്നിരുന്ന റജീന ആകർഷകമായ വ്യക്തിത്തമായിരുന്നു..അവൾ ആവോളം സന്തോഷം ക്ലാസ്സിൽ നിറച്ചിരുന്നു..പ്ലസ്ടുവിനു ശേഷം നഴ്സിംഗ് പഠിക്കാൻ പോയ അവൾ ആത്മഹത്യ ചെയ്തു..വിവാഹ വാഗ്ദാനം ചെയ്ത് ഉപയോഗിച്ച ശേഷം വഞ്ചിച്ച പട്ടാളക്കാരനായ യുവാവിന്റെ ഇര.
ഉണ്ണിക്കൃഷ്ണൻ മാഷ് പോയത് കല്യാണം കഴിക്കാൻ പ്രായമായ സ്വന്തം പെൺകുട്ടിയെ തനിച്ചാക്കിയാണു..ഒരു തുണ്ട് കയറിൽ ആ വലിയ മനുഷ്യൻ.....
പ്രദീപ് കുമാർ എന്ന ഊർജ്ജസ്വലനായ ചെറുപ്പക്കാരൻ, ഞങ്ങളുടെ ഫിസിക്സ് മാഷ് ഒരു രാത്രി അമ്മയ്ക്ക് വലിയൊരു കത്ത് എഴുതി വച്ച് വിഷം കഴിച്ചു....

പറച്ചിലിൽ ഒരുപാട് പേർ ഉൾപ്പെട്ടിട്ടില്ല, ഒട്ടനവധി സന്ദർഭങ്ങളും ഒഴിഞ്ഞ് പോയിട്ടുണ്ടാകാം..അവ എല്ലാം ഇവിടെ ഒരു കമന്റിലൂറ്റെയോ അല്ലെങ്കിൽ ഒരു മെയിൽ ആയോ എന്നെ തേടി എത്തുമെന്ന ഉറപ്പുണ്ട് J

Tuesday, August 23, 2011

പൂവേ പൊലി..പൊലി.!!


ഓണം !!
കൊല്ലം ആരും ചാകല്ലേ എന്നായിരിക്കും പ്രാർത്ഥന..
കാരണം പൂവിടൽ മുടങ്ങും, അതന്നെ :))
അങ്ങനെ ആരുമാരും മരിക്കാത്ത എല്ലാ കൊല്ലങ്ങളിലും ഞങ്ങൾ പൂവിട്ട് കൊണ്ടേ ഇരുന്നു..

അത്തത്തിന്റെ തലേന്ന് സ്കൂൾ വിട്ട് വന്നാലുടൻ കൈക്കോട്ടും മങ്കൊട്ടയുമായി (മൺ-കൊട്ട) പറമ്പിലേക്ക് ഓട്ടം.കൊത്തിയിളക്കി രണ്ട് മൂന്ന് കൊട്ട മണ്ണ് മുറ്റത്ത് തുളസിത്തറയ്ക്ക് അരികിൽ കൂട്ടിയിടും. എളിക്ക് കൈകുത്തി വല്യമ്മ വന്ന് സ്ഥാനമൊക്കെ നിർണ്ണയിച്ചാൽ പൂത്തറ കെട്ടലായി. കൂമ്പനെ മണ്ണ് കൂട്ടി, നനച്ച്  നിലം തല്ലി കൊണ്ട് ചുറ്റും അടിച്ച് ഉറപ്പിച്ചൽ അസ്സൽ തറയായി ! ചളുങ്ങി ചപ്പ്ലീസായ ഒരു അലുമിനിയപ്പാത്രത്തിൽ കലക്കിയ ചാണകവുമായി അമ്മ റെഡികുന്തിച്ചിരുന്ന് ചാണകം മെഴുകിക്കഴിഞ്ഞാൽ പൂത്തറ ഇങ്ങനെ മിനുങ്ങും..ആഹഹ ആഹഹ ..

പുലർച്ചെ എന്ന് വച്ചാൽ ഒരു നാലു മണിക്ക്  എണീക്കും..ഇറയത്ത് തൂക്കിയിട്ട പൂക്കുട്ടകൾ ഓരോന്നായി എടുത്ത് കഴുത്തിൽ തൂക്കും..ചുരുങ്ങിയത് 3 കൊട്ടകൾ ഉണ്ടാകും ഒരാൾക്ക്..ഓരോരുത്തർക്കും പറിക്കാൻ ഓരോ പൂക്കളുമുണ്ട്, അത് പുറപ്പെടുമ്പോൾ തന്നെ ധാരണയിലെത്തും..
“ ഉണ്ണ്യേ ഇങ്ങി മുള്ളുമ്പൂവും,വേല്യേരീം പറയ്ക്കണം..വെള്ളറണ്ടേലെ മതിലുമ്മലുള്ള അരിപ്പൂവ് കോവുമ്മലേ കൂട്ടർ എണീക്കും മുൻപ് പറയ്ക്കണം ഇല്ലേൽ തണ്ടുപോലും അയിറ്റ്യേൾ ബാക്കി വെക്കൂല..”
മുള്ളുമ്പൂവ് (തൊട്ടാവാടി) പറിയ്ക്കുന്നത്  ഇത്തിരി സാഹസപ്പെട്ട പരിപാടി ആണെങ്കിലും എനിക്ക് പെരുത്തിഷ്ടപെട്ട ഏർപ്പാടായിരുന്നു..എന്താന്ന് ചോദിച്ചാൽ ഒരു പറമ്പിൽ തന്നെ വെളുക്കും വരെ ഇരുന്ന് പറച്ചാലും തീരാത്ത പൂവുണ്ടാകും ..ചേമ്പില കൊണ്ട് ഉണ്ടാക്കിയ കുമ്പിളിൽ മുള്ളുമ്പൂവ് അങ്ങനെ കൂമ്പാരമായി കിടക്കും !!

ഇരുട്ടിൽ തിളങ്ങുന്ന കൂവ്വപ്പൂവ് പറയ്ക്കുന്നത് തോട്ടിൽ ഇറങ്ങി നിന്നാണു..വെളിയൻ തോടിന്റെ ഇരുകരയിലുമായി തുരുത്യാട്ടെ കുട്ടികൾക്ക് മുഴുവൻ പറയ്ക്കാനുള്ള കൂവ്വ മത്സരിച്ചെന്നോണം തഴച്ച് വളർന്നിരുന്നു..വീട്ടിലെ ആലയുടെ-തൊഴുത്തിന്റെ പിന്നിൽ ആൾപ്പൊക്കത്തിൽ കടുമ്പച്ചക്കാടായി നിന്ന കൃഷ്ണമുടിയിൽ ഓണം കഴിയും വരെ പറിച്ചാലും പൂക്കൾ ബാക്കിയാകും..ചുവന്ന കൃഷ്ണമുടിയിൽ എപ്പോഴും മഞ്ഞ ചിറകുള്ള പൂമ്പാറ്റകൾ പാറിക്കളിച്ച് കൊണ്ടിരുന്നു..

കുറച്ച് മുൻപ് പൂക്കൊട്ടയെപറ്റി പറഞ്ഞില്ലേ ?
പൂക്കൊട്ട ഉണ്ടാക്കുന്നത് കാണാൻ നല്ല രസമാണു. തെങ്ങോലയോ പനയോലയോ ഈർക്കിലെല്ലാം കളഞ്ഞ് ചെത്തി വൃത്തിയാക്കി മെടയുന്നു.. മെടഞ്ഞ കണ്ണികൾ വിട്ട് പോകാതിരിക്കാൻ കാരമുള്ള് കുത്തി വയ്ക്കും..മെടഞ്ഞ് മുകളിലെത്തുമ്പോൾ മുള്ള് ഊരി മുകളിൽ കുത്തും..അങ്ങനെ അരമണിക്കൂർ കൊണ്ട് കൊട്ടയാകും..പിന്നെ നല്ല ചാക്കുനൂൽ ഒരു രണ്ട് കൈ നീളത്തിൽ മുറിച്ചെടുത്ത് കൊട്ടയുടെ രണ്ട് വശത്തും കോർത്ത് കെട്ടുന്നതോടെ പൂക്കൊട്ട തയ്യാർ !!
ഇത് പുക കൊള്ളിക്കലാണു പിന്നെ. അതിനു കൊട്ടകൾ എല്ലാം കൂടെ അടുപ്പിനു അരികിൽ അടുക്കളയുടെ മൂലയിൽ ഉറിയുടെ താഴെ എങ്ങാനും കെട്ടിയിടും..നാലഞ്ചു ദിവസം പുക കൊണ്ടാൽ പൂക്കൊട്ട ഒരു മൂന്നു നാലു വർഷം ഈട് നിൽക്കും !!  പൂക്കൊട്ടകൾ ഉണ്ടാക്കാൻ വിദഗ്ദരായിരുന്നു, ചേനികണ്ടിയിലെ രാഘവക്കുറുപ്പും ( ഞങ്ങളുടെ എല്ലാം രാഘോൻ കുട്ട്യാട്ടൻ :) ) അദ്ദേഹത്തിന്റെ മകൻ ബാലൻ നമ്പ്യാരും..പിന്നെ ദാമോദരൻ മൂത്തച്ഛൻ അസ്സലായി കൊട്ട മെടയുമായിരുന്നു..(ചാരായം കുടിച്ച് ബീഡി ഒക്കെ വലിച്ച് അലമ്പായി നടക്കുന്ന പുള്ളി ഓണമായാൽ ഒരു ആട്ടിൻ കുട്ടിയെപ്പോലെ വല്യമ്മയുടെ നിർദ്ദേശാനുസരണം കൊട്ട മെടയുന്നത് രസകരമായ കാഴ്ചയായിരുന്നു :)) )

പറിക്കാൻ ഏറ്റവും അധികം ക്ഷമ ആവശ്യമുള്ള പൂവ് തുമ്പ ആകുന്നു..! തല ഒന്നായി നുള്ളിയെടുക്കാതെ പൂവ് മാത്രം ഇതർത്തെടുക്കുക അൽ‌പ്പം പ്രയാസമുള്ള പണി തന്നെ..എന്നിട്ടും ശാലിച്ചേച്ചി( അച്ഛന്റെ മൂത്ത ജ്യേഷ്ഠന്റെ മകൾ) രണ്ട് കൊട്ട തുമ്പയൊക്കെ ദിവസവും പറിച്ചിരുന്നു ! കുയിൽ കാക്കയ്ക്ക് പണികൊടുക്കും പോലെ ഞാൻ എന്റെ കൊട്ടയുടെ മൂലയിലുള്ള ഇത്തിരി തുമ്പ കൂടി ചേച്ചിയുടെ കൊട്ടയിലിട്ട് വീട്ടിലെത്തി പ്രഖ്യാപിക്കും “ നോക്ക് !! തുമ്പ നോക്ക് ..രണ്ട് കൊട്ട !! ഞാനും ശാലീം കൂടെ പറച്ചതാ :))

മിക്ക ദിവസങ്ങളിലും ചീവീട് കരയുന്ന പ്രഭാതങ്ങളിൽ ഇരുട്ടിൽ തപ്പി പറമ്പിലേക്ക് കാൽ വയ്ക്കുമ്പോഴെ കൊളോറത്തെ പറമ്പിൽ പാട്ടു കേൾക്കും !! ഓണപ്പാട്ട്..കല്യാണി അമ്മ ആയിരിക്കും. അവർ അസ്സലായി പാടും..ഗോവിന്ദേട്ടന്റെ വിതച്ച വയലിൽ കാവൽ നിൽക്കുമ്പോളെല്ലാം ആ അമ്മ ഇനിയുമെനിയും കേൾക്കാൻ ഞാൻ കൊതിച്ച പാട്ടുകൾ പാടിയിരുന്നു..പേരക്കുട്ടികളെ സഹായിക്കാൻ കുമ്പിളിൽ തുമ്പപ്പൂവിറുക്കവേ കല്യാണി അമ്മ പാടുകയാണു..അവരുടെ നേർത്ത, നനുത്ത ശബ്ദം ഇപ്പോഴും എന്റെ കാതുകളെ അലോസരപ്പെടുത്തുന്നുണ്ട്..നഷ്ടബോധം ഓർമ്മിപ്പിച്ച്..
“ആനാ പോകുന്നാ
പൂമരത്തിന്റേ
ചോടെ പോകുന്നത്താരടാ..
ആരാനുമല്ലാ
കൂരാനുമല്ലാ
കുറ്റിക്കാട്ടിലെ
കുറുമ്പന്നി..
പന്നിവാലുമ്മൽ
തൂവലുംകെട്ടി..
.........................
സത്യമായും ഇതെഴുതുമ്പോൾ സങ്കടം വരികയാണു..എന്റെ വല്യമ്മ മരിച്ചു, കല്യാണി അമ്മ മരിച്ചു,രാഘവ ക്കുറുപ്പ് മരിച്ചു...അവരോടൊപ്പം അവർ എന്തൊക്കെയോ കൊണ്ട് പോയപോലെ..ഓണങ്ങൾ അങ്ങനെ ശൂന്യമായ പോലെ..എന്തായാലും പാട്ട് പറമ്പുകളിൽ നിന്ന് പറമ്പുകളിലേക്ക് പടരും..
പൂവേ പൊലി പൊലി..
പൂവേ പൊലി പൊലി...

തുമ്പയും, വേലിയേരിയും,സോപ്പിൻ കായും (വയലിൽ കാണുന്ന കളയുടെ അരി. അത് ഉതിർത്ത് കയ്യിലിട്ട് ഒരിത്തിരി വെള്ളം ചേർത്ത്  തിരുമ്മിയാൽ സോപ്പ് പോലെ പതയും ! ) ഒക്കെ ചിലപ്പോൾ തലേന്ന് വൈകുന്നേരം തന്നെ പറച്ച് സൂക്ഷിക്കാറുണ്ട്..പക്ഷെ പൂക്കളത്തിൽ തൃക്കാക്കരപ്പനെ മൂടാൻ അന്നന്ന് പറയ്ക്കുന്ന പുത്തൻ തുമ്പ തന്നെ വേണം !

പൂ പറയ്ക്കാൻ പോകുന്ന രാവിലെകളിൽ ഞങ്ങൾ നേരിടാറുള്ള രണ്ട് ഭീകരാക്രമണങ്ങൾ ഒന്ന് കൊടിത്തുവ്വയും മറ്റൊന്ന് ചാണകവും ആകുന്നു :) .. മുള്ളിൻപൂവോ വേലിയേരിയോ പറയ്ക്കാനുള്ള തത്രപ്പാടിൽ പറമ്പിൽ പടർന്ന് കിടക്കുന്ന തുവ്വ ഭീകരനെ ശ്രദ്ധിച്ചിട്ടുണ്ടാകില്ല..പണികിട്ടും..ദേഹമാസകലം നീറാൻ തുടങ്ങുമ്പോൾ മനസ്സിലാക്കാം ആക്രമണത്തിന്റെ ഉത്തരവാദിത്തം കൊടിത്തുവ്വ ഏറ്റെടുത്തു എന്നു...പിന്നെ കാട്ടപ്പ പറിച്ച് തേക്കലായി..മറുമരുന്ന്..!
പശുവിനെ കെട്ടുന്ന ഏരിയകൾ ഏതാണ്ട് എല്ലാർക്കും ഒരു ധാരണ കാണും ഇരുട്ടിലും..അതിനാൽ അത്തരം സ്ഥലങ്ങളിൽ എത്തുമ്പൊൾ കാൽ നിലത്ത് വയ്ക്കുന്നത് അഫ്ഗാനിസ്ഥാനിലെ മൈനിട്ട റോഡിലൂടെ പോകും പോലെ ആയിരിക്കും..എന്നാലും കിട്ടേണ്ടവർക്ക് കിട്ടും ..സൂക്ഷിച്ച് കാൽ വയ്ക്കുമ്പോൾ കേൾക്കാം - ‘പ്ലക്ക് ‘ !!

യുദ്ധം കഴിഞ്ഞുള്ള യോദ്ധാക്കളെപോലെയാണു പൂ പറച്ചുള്ള വരവ്..
കൊട്ടകളു കുമ്പിളുകളുമെല്ലാം പൂത്തറയ്ക്ക് സമീപത്ത് വച്ച് കുളിക്കാൻ പൊകുന്നു..കല്ലങ്കി കുളത്തിൽ ചാടി നീന്തി വിശാലമായൊരു കുളി !തിടുക്കത്തിൽ തിരിച്ച് വന്ന് ചന്ദനം അരച്ച് തൊട്ട് , വിളക്ക് കത്തിച്ച്, പൂവിടൽ തുടങ്ങുകയായി..
തൃക്കാക്കരപ്പനെ ( മിനുത്ത ഒരു വെള്ളാരങ്കല്ല് ) തുളസി ഇലയ്ക്ക് മേലെ വച്ച് മറ്റൊരു തുളസി ഇലകൊണ്ട് മൂടുന്നു.. പിന്നെ അത് മറയും വിധം തുമ്പപ്പൂ ഇട്ട് അതിനു ചുറ്റും കളങ്ങൾ തീർക്കുന്നു..പൂത്തറ നിറഞ്ഞാൽ ചെമ്പരുത്തി കൊണ്ട് കുട ഉണ്ടാക്കി കുത്തും ( ചെമ്പരുത്തിയുടെ ഞെട്ട് കളഞ്ഞ് അതിലൂടെ ഈർക്കിൽ കടത്തിയാൽ കുട റെഡി ! ) ഒന്നാം ഓണത്തിനു ഒരു കുട, രണ്ടാം ദിവസം രണ്ട് കുട..ഒമ്പതാം ദിവസമാകുമ്പോഴേക്കും തറ മുഴുവൻ കുട കാണും :)

മലയാണ്മയുടെ പല തീരാ നഷ്ടങ്ങൾക്കുമൊപ്പം പൂക്കളങ്ങളും...
കാർപെറ്റ് പോലെ ഇൻസ്റ്റന്റ് പൂക്കളങ്ങൾ വിപണിയിലുണ്ട്..അത് കാണുമ്പോൾ ഒരിക്കലും ചിരി വന്നിട്ടില്ല. വല്ലാത്ത സങ്കടമാണു..തൊട്ടടുത്ത തലമുറയോട് വല്ലാത്ത സഹതാപമാണു..കാര്യമില്ല..കാരണം നമുക്ക് മുൻപ് നടന്ന് പോയവർക്ക്  നമ്മോട് തോന്നിയത് ഇതേ വികാരം തന്നെ !!

എല്ലാർക്കും ഓണാശംസകൾ.




Wednesday, July 13, 2011

നെടൂളാന്‍ !!

മന്ദന്‍ കാവിലെ ഇളയമ്മയ്ക്ക്‌ എന്തെങ്കിലുമൊക്കെ പറയാനുണ്ടാകും. ആ ഒരു കാരണം കൊണ്ട്‌ തന്നെ ഇളയമ്മയുടെ വരവ്‌ ഏറ്റവുമധികം സന്തോഷിപ്പിച്ചിരുന്നത്‌ എന്നെ ആയിരിക്കണം.
രാത്രി ആഹാരത്തിനു ശേഷം കോലായില്‍ കാലും നീട്ടിയിരുന്ന്‌ പെണ്ണുങ്ങള്‍ക്കൊപ്പം കഥ കേള്‍ക്കുക എന്തൊരു സുഖമുള്ള ഏര്‍പ്പാടാകുന്നു ! മന്ദങ്കാവില്‍ ഒരുപാട്‌ തവണ പോയിട്ടുള്ളതിനാല്‍ ഇളയമ്മയുടെ വിവരണങ്ങള്‍ മനസ്സില്‍ ചിത്രീകരിച്ചെടുക്കാന്‍ എനിക്ക്‌ നന്നായി കഴിഞ്ഞിരുന്നു. അത്‌ കൊണ്ട്‌ തന്നെ കഥാവസാനം ഏറ്റവുമധികം ആഘാതമേല്‍ക്കുന്നതും എനിക്ക്‌ തന്നെ !

കീഴ്ക്കോട്ട്‌ കടവില്‍ നിന്നും പുഴയരികിലൂടെ ഒരു ഇരുപത്‌ മിനുറ്റ്‌ നടന്ന്‌ കൊയില്യത്ത്‌ എത്താനാകുമ്പോള്‍ ഒരു കടവുണ്ട്‌. അവിടെയാണു ഇനി പറയാന്‍ പോകുന്ന സംഭവം നടന്നത്‌.
മഴക്കാലമാണു.
സായം സന്ധ്യ. തിരി മുറിയാതെ പെയ്യുന്ന മഴയത്ത്‌ രണ്ട്‌ കൂട്ടുകാര്‍ പുഴ കടക്കാന്‍ കാത്ത്‌ നില്‍ക്കുന്നു.ഒരാളുടെ കൈയില്‍ വലിയൊരു മഴുവുണ്ട്‌.
കോരിച്ചൊരിയുന്ന മഴയില്‍ തോണിക്ക്‌ കാത്ത്‌ നിന്നിട്ട്‌ വലിയ കാര്യമില്ലെന്ന്‌ തോന്നിയതിനാല്‍ അവര്‍ പുഴക്ക്‌ കുറുകെ നീന്താന്‍ തീരുമാനിച്ചു. നീന്തും മുന്‍പ്‌ സൌകര്യത്തിനായി മഴു ഊരി മരത്തിന്റെ പിടി ഒരാളും ഇരുമ്പിന്റെ ഭാഗം മറ്റെ ആളും പിടിച്ചു. അക്കരെയെത്തിയത്‌ ഒരാള്‍ മാത്രം.! ഇരുമ്പ്‌ കൈവശമുള്ള ആള്‍ മാത്രം ! പിറ്റേന്ന്‌ നീലിച്ച്‌ രക്തമൂറ്റിയ നിലയില്‍ മറ്റേ ആളുടെ മ്രിത ദേഹം രണ്ടുമൂന്നു കിലോമീറ്റര്‍ ദൂരെ കരയ്ക്കടിഞ്ഞു. പിന്നീട്‌ അതിലെ നീന്തുന്നവരും, കടവില്‍ കുളിക്കാനിറങ്ങുന്നവരുമെല്ലാം ഇരുമ്പായി ഒരു മൊട്ടുസൂചിയെങ്കിലും കൈയില്‍ കരുതിക്കൊണ്ടിരുന്നു.

ഏതാണ്ട്‌ പത്ത്‌ പന്ത്രണ്ട്‌ വര്‍ഷങ്ങള്‍ക്ക്‌ മുന്‍പൊരു തണുത്ത രാത്രി.
നല്ല നിലാവുണ്ട്‌. നഗരത്തില്‍ നിന്നും സെക്കന്റ്‌ ഷോ കഴിഞ്ഞ്‌ ലാസ്റ്റ്‌ ബസ്‌ കിട്ടാതെ നടന്ന്‌ അവശനായി വരുന്ന ഒരു യുവാവ്‌ പുലച്ചുടലയ്ക്ക്‌ മുന്നിലെ വിജനമായ പ്രദേശത്ത്‌ കലുങ്കിനു മുകളില്‍ ഒരാളിരിക്കുന്നത്‌ കണ്ടു ! അടുത്ത്‌ എത്തിയപ്പോള്‍ കൈലിമുണ്ടും ഇരുണ്ട നിറത്തിലുള്ള കുപ്പായവുമിട്ട അയാളെ ഇതിനു മുന്‍പ്‌ അവിടെയെങ്ങും കണ്ടില്ലെന്ന്‌ യുവാവ്‌ ഉറപ്പിച്ചു. പോക്കറ്റില്‍ നിന്നും ഒരു സിഗരറ്റെടുത്ത്‌ അയാള്‍ കലുങ്കിനരികിലേക്ക്‌ ചെന്നു. തീപ്പെട്ടിയുണ്ടോയെന്ന് അപരിചിതനോട്‌ ചോദിച്ചു. അയാള്‍ തീപ്പെട്ടി നീട്ടിയപ്പോള്‍ യുവാവ്‌ കൈയും നീട്ടി. തീപ്പെട്ടി താഴെ അപരിചിതന്റെ കാല്‍ക്കല്‍ വീണു. യുവാവ്‌ കുനിഞ്ഞ്‌ തീപ്പെട്ടിയെടുക്കവെ അപരിചിതന്‍ കൈലി മുണ്ട്‌ പൊക്കി. രണ്ട്‌ കുതിരക്കാലുകള്‍ !!!! യുവാവ്‌ ഒരലര്‍ച്ചയോടെ പിന്നോട്ട്‌ മറഞ്ഞു.

മണിയങ്കോട്ടെ വീട്ടില്‍ വിറക്‌ കീറാന്‍ വന്നിരുന്ന മൂത്തോറന്‍ കഥകളുടെ ഒരു ഭണ്ഡാരമായിരുന്നു.! അയാള്‍ ഒരു തോര്‍ത്ത്‌ മാത്രമെ ധരിക്കുമായിരുന്നുള്ളു. അതും വയനാട്ടിലെ തണുപ്പില്‍ !
കുന്തിച്ചിരുന്ന് ചായ ഊതിക്കുടിക്കവെ മൂത്തോറന്‍ കഥകളുടെ ഭാണ്ഡം തുറക്കും.
അത്തരമൊരു കഥയാണിത്‌. മൂത്തോറന്റെ അനുഭവം.
വ്രിശ്ചികമാസത്തിലെ മഞ്ഞുമൂടിയ ഒരു രാത്രി. മൂത്തോറന്‍ ദൂരെ എവിടുന്നോ വരുന്ന വരവാണു.ഓടമ്പത്തെ കുന്നിറങ്ങണം. ആകാശത്തേക്ക്‌ പടര്‍ന്ന് പന്തലിച്ച മഴ മരങ്ങളും, മെലിഞ്ഞ്‌ മിനുത്ത യൂക്കാലിപ്റ്റസ്‌ മരങ്ങളും തിങ്ങി ഞെരുങ്ങി വളരുന്ന ഓടമ്പത്തെ കുന്നിന്‍ മുകളില്‍ നട്ടുച്ചക്ക്‌ തന്നെ ടോര്‍ച്ചടിക്കാതെ പോകാന്‍ പ്രയാസമാണെന്നോര്‍ക്കണം !
പണ്ടെങ്ങോ എസ്റ്റേറ്റ്‌ പണിക്കാര്‍ താമസിച്ചിരുന്ന 'പാടി'ക്ക്‌ അരികിലെത്തിയപ്പോള്‍ ഇലകള്‍ ഞെരിയുന്ന ഒരു ശബ്ദം ! മൂത്തോറന്‍ തിരിഞ്ഞു നോക്കി. ആറേഴടി ഉയരമുള്ള ഒരു പോത്ത്‌ ! നട്ടപ്പാതിരയായിട്ടും ഇതിനെ ആരും അഴിച്ച്‌ കൊണ്ട്‌ പോകാത്തതെന്താണെന്ന് ചിന്തിക്കവെ മൂത്തോറന്റെ തലയില്‍ ഒരു കൊള്ളിയാല്‍ മിന്നി. ഒടിയന്‍ !!! അവന്‍ പൂച്ചയുടെയും, ആടിന്റെയും, പോത്തിന്റെയുമെല്ലാം രൂപത്തില്‍ വരും..ഇരകള്‍ ആരായാലും ഒരു തവണ തിരിഞ്ഞു നോക്കിയാല്‍ കഥ കഴിഞ്ഞു ! സ്വന്തം രൂപം സ്വീകരിച്ച്‌ കൈയിലുള്ള കൊള്ളി, വടി ഒടിക്കും. ഒപ്പം ഇര ആ കൊള്ളി പോലെ ഒടിഞ്ഞുവീണു പിടഞ്ഞു ചാകും !! മണിയങ്കോട്ടപ്പനെയും, സകല മല ദൈവങ്ങളെയും വിളിച്ച്‌ കരഞ്ഞു കൊണ്ട്‌ മൂത്തോറന്‍ ഓടി. ഒടിഞ്ഞില്ല പക്ഷെ ഒരാഴ്ച്ച പനിച്ചു കിടന്നു.

മരണത്തിന്റെ ദൂതുമായെത്തുന്ന 'നെടൂളാനെ' കണ്ടിട്ടുണ്ടോ?
ആള്‍ ഒരു പാവം പക്ഷിയാകുന്നു.ഒരു പ്രാവിന്റെ മാത്രം വലിപ്പം.
പകല്‍ മിണ്ടില്ല. രാത്രിയില്‍ നീട്ടി കൂവും.എന്നും കൂവില്ല.പിറ്റേന്ന് നാട്ടിന്‍പുറത്ത്‌ ആരെങ്കിലും മരിക്കാന്‍ ഉണ്ടെങ്കില്‍ മാത്രം !!
വിശ്വസിച്ചാലും ഇല്ലെങ്കിലും ഒരിക്കലല്ല ഒരുപാട്‌ തവണ നെടൂളാന്‍ കൂവിയതിന്റെ പിറ്റേന്ന് ആളുകള്‍ മരിച്ചു.!തെക്കെ കറ്റവത്തെ രാവുണ്ണി നായരും,തളീക്കുളങ്ങര ഗോപാലന്‍
നായരും, മിലിട്ടറി കോമന്‍ നമ്പിയാരും,എളോറത്ത്‌ കല്യാണി അമ്മയും,കക്കോട്ടുമ്മല്‍ മമ്മദ്‌ ഹാജിയും മരിച്ചതിന്റെ തലേ ദിവസങ്ങളില്‍ നെടൂളാന്‍ കൂവിയപ്പോള്‍ വല്യമ്മ അതിനെ തലയില്‍ കൈ വെച്ച്‌ ശപിച്ചിരുന്നു. " പണ്ടാരം കൂക്കുന്ന്ണ്ട്‌.. നാളെ ആര്യാണപ്പോ കൊണ്ട്വോക്ന്നത്‌ ??? "

Saturday, July 9, 2011

രണ്ട്‌ ഷാരസ്യാര്‍മാരും ഞാനും !

ആരും തല പുകയ്ക്കുകയോ പുണ്ണാക്കുകയോ വേണ്ട !
ഷാരസ്യാര്‍മാര്‍ എന്റെ അല്ല. ഞാന്‍ പിഷാരടിയുമല്ല.
ബഷീര്‍ അഭിപ്രായപ്പെട്ട പോലെ വേണെങ്കില്‍ പൈസ വാങ്ങി ഒരു ജാതി രെജിസ്റ്റ്രേഷന്‍ നടത്താം, എന്നിട്ട്‌ ബഷീര്‍ 'മുഹമ്മദ്‌ ബഷീര്‍ നമ്പൂതിരിപ്പാട്‌' ആയ പോലെ അടിയനും വല്ല വിഘ്നേഷ്‌ എംബ്രാന്തിരിയോ വേറെ ഏതെങ്കിലും പുലിയോ ആകാവുന്നതാണു. !
പീക്കിരിപ്പിള്ളേര്‍ മുതല്‍ പീ എച്ച്‌ ഡിക്കാരും, എഴുത്തുകാരും,പത്രാധിപന്‍മാരും,കണ്ടക്ടര്‍മാരും, മാഷന്‍മാരും, മാഷികളും, ആരാച്ചാരും ഡോക്ടറുമുള്‍പ്പെടെ സമൂഹത്തിലെ എല്ലാ അഴുക്കുചാലിലുമുള്ളവര്‍ പേരിനൊപ്പം ജാതി പ്രദര്‍ശിപ്പിക്കാന്‍ അടികൂടുന്ന ഉത്തരാധുനിക കാലത്ത്‌, അല്ലെങ്കില്‍ ആധുനികോത്തര കാലത്ത്‌ എന്ത്‌ കൊണ്ടും ഇത്‌ നന്നായിരിക്കും !


ആദ്യത്തെ തല്ല് ബിന്ദു പിഷാരടിയുമായിട്ടാകുന്നു.
ഒരു സത്യം ആദ്യമേ പറഞ്ഞോട്ടെ, നിങ്ങള്‍ക്ക്‌ വേണമെങ്കില്‍ അക്ഷരങ്ങള്‍ കൊണ്ടെന്നെ സോഷ്യല്‍ നെറ്റ്‌ വര്‍ക്കുകളുടെ മുറ്റത്ത്‌ കെട്ടിത്തൂക്കുകയോ വിചാരണ ചെയ്യുകയോ ആവാം എന്നാലുമ്പേരിനൊപ്പം ജാതി ചേര്‍ക്കുന്ന സമ്പ്രദായത്തിനു ഞാനെതിരാണു.
തറവാട്ട്‌ പേരിനാല്‍ ആളെ തിരിച്ചറിയാന്‍ സ്വാതി ഇളമണ്‍ എന്നോ,ഭര്‍ത്താവിന്റെ വാല്‍ ആനെന്ന് മറ്റാരെങ്കിലും ധരിച്ചു കളയുമെന്ന ഭയങ്കരമായ പേടിയില്ലെങ്കില്‍ ബിന്ദു അനില്‍ എന്നോ,സ്വന്തം പിതാവിനോട്‌ ജീവിച്ചിരിക്കുമ്പോഴും മരിച്ച ശേഷവും നീതി കാട്ടാന്‍ സലില മുല്ലന്‍ എന്നോ,സഫിക്സ്‌ ലോകത്തെ ആണ്‍കുത്തക തകര്‍ത്ത്‌ തരിപ്പണമാക്കി സിബി സരസമ്മയെന്നോ പേരു വയ്ക്കുന്നതില്‍ അഭംഗി തോന്നിയിട്ടില്ല. കൂടെ പറഞ്ഞോട്ടെ ജാതി തൊട്ടുള്ള കളി തീക്കളി ആകുന്നു ! അത്‌ കൊണ്ട്‌ സൌഹ്രിദങ്ങളുടെ അദ്രിശ്യാവകാശങ്ങളില്‍ ഒന്നായാണു ബിന്ദുവിനോട്‌ അഭിപ്രായം രേഖപ്പെടുത്തിയത്‌..പേരു കണ്ടിട്ടല്ല, അവളുടെ ഈ മെയില്‍ വിലാസം കണ്ടിട്ട്‌.
അതിപ്രകാരമാകുന്നു. " ഷാരസ്യാര്‍ അറ്റ്‌ ഹോട്‌ മെയില്‍ ഡോട്ട്‌ കോം"
എന്തോ ഒരു ദഹനക്കേട്‌..
( തരം പോലെ ക്രിമി കടി,ഇളക്കം,ഇത്യാദികളായ മനോഹര പദങ്ങള്‍ ഉപയോഗിക്കാം )
തുറന്ന് ചോദിച്ചു.
"പ്രിയ ബിന്ദു, കണാരന്‍ തിയ്യന്‍, പറാന്‍ പൊലയന്‍, ചാത്തുപ്പറയന്‍,തോണ്ടന്‍ പണിയന്‍, നിഖില്‍ കുറിച്യന്‍ തുടങ്ങിയ പേരുകളോ, അത്‌ പോലെ തിയ്യന്‍ അറ്റ്‌ ജീമെയില്‍ ഡോട്‌ കോം, ചെറുമന്‍ അറ്റ്‌ യാഹൂ ഡോട്‌ കോം എന്നൊക്കെയോ ഉള്ള വിലാസങ്ങള്‍ എവിടെ?? അപ്പോള്‍ എവിടെയോ പൊരുത്തക്കേടില്ലെ??
എന്തായാലും മാന്യമായ ഭാഷയില്‍ ഭര്‍ത്സിച്ച്‌ കൊണ്ട്‌ ഒരു മറുപടി മെയില്‍ കിട്ടി.
അതിന്റെ വിശാലമായ ഉള്ളടക്കം ഇങ്ങനെ 'സംഹരിക്കാം'
" എന്റെ കാര്യം നോക്കാന്‍ എനിക്കറിയാം "

അടുത്ത തല്ല് ജാതി ചോദിച്ചിട്ട്‌ കിട്ടിയതല്ല !
അത്‌ കൊണ്ട്‌ ആരും ഞാന്‍ ഈ ഷാരസ്യാരെ കുറ്റപ്പെടുത്തുകയാണെന്ന് ധരിക്കരുത്‌.
നളിനി പിഷാരടി നായിക, പതിവ്‌ പോലെ ഞാന്‍ വില്ലന്‍.
ഇന്ത്യ 20-20 പൊറാട്ട്‌ കപ്പ്‌ വാങ്ങിയതിന്റെ പിറ്റേ ദിവസം.
നളിനിയുടെതായി ഒരു സ്റ്റാറ്റസ്‌.
"ഇന്ത്യ 5 വിക്കറ്റിനു ജയിക്കും,ഞാന്‍ ഉറങ്ങാന്‍ പോകുന്നു,"
തൊട്ടു താഴെ നളിനി തന്നെ എഴുതിയുണ്ടാക്കിയ ഒരു കുറിപ്പും.
പോസ്റ്റെഡ്‌ അറ്റ്‌ 5 പി.എം.
ഏത്‌ സ്ത്രീ സ്റ്റാറ്റസ്സിനും സംഭവിക്കും പോലെ പിപീലികാ ഘോഷയാത്ര ആരംഭിച്ചിട്ടുണ്ട്‌.
കൂട്ടത്തിലൊന്ന് ഈ കശ്മലന്റെ ആകുന്നു
" ഇത്‌ ഇവള്‍ കളി കഴിഞ്ഞ ശേഷം ഇട്ടതാണെന്ന് തോന്നുന്നു. എന്തിനു വിഡ്ഡികള്‍ ആകണം?? "
കമന്റ്‌ ഇട്ട ശേഷം ആണു ചിന്തിച്ചത്‌, പേരു മാത്രമെ അറിയുള്ളു പ്രായം അറിയില്ല.ഇവള്‍ എന്നൊക്കെ വലിയ വായില്‍ വിളിച്ച്‌ പറഞ്ഞല്ലോ.
പക്ഷെ അപ്പോഴേക്കും സംഭവിക്കാനുള്ളത്‌ സംഭവിച്ചു !
ഷാരസ്യാര്‍ എന്നെ അണ്‍ഫ്രണ്ട്‌ ചെയ്തു !
എന്നിട്ടും അരിശം തീരാഞ്ഞിട്ട്‌ എന്റെ കമന്റിനു താഴെ നഞ്ഞില്‍ മുക്കിയ ഒരു മനോഹര കമന്റ്‌ !
"ഫേസ്‌ ബുക്കില്‍ ഞാന്‍ ഒരുപാട്‌ ചീത്ത ആളുകളെ കണ്ടിട്ടുണ്ട്‌, അതില്‍ ഏറ്റവും ചീത്ത ആകുന്നു വിഘ്നേഷ്‌ !"
മനോഹരമായ ആ വാക്‌ പുരസ്കാരം ഇപ്പോഴും നന്ദിയോടെ മനസ്സില്‍ സൂക്ഷിക്കുന്നു !!

Thursday, May 26, 2011

ഈശ്വരാ ഇക്കൊല്ലവും കൈ പൊട്ടണേ...!!

പണ്ട് കാലത്ത് ഓരോ പെണ്ണുങ്ങളും ചുരുങ്ങിയത് 5 കൂടിയത് 20 തവണയെങ്കിലും പ്രസവിച്ചിരുന്നു !! ഒരു തവണ തന്നെ പ്രസവിക്കുന്നതിന്റെ അപാരമായ വേദനയും, പ്രസവിച്ചു കഴിഞ്ഞാല് ചാടുന്ന വയറിനെ ഒതുക്കി 'വടിവ്' വീണ്ടെടുക്കാനുള്ള ഭാഗീരഥ പ്രയത്നങ്ങളും ഓര്ക്കുമ്പോള് ഗര്ഭം തന്നെ വേണ്ട്ന്നു വച്ചാലോ എന്ന് ആലോചിക്കുന്ന വ്രികോദരകള് ഏറെയുണ്ടത്രെ !  അപ്പോഴാണു ആയമ്മമാര് അന്ന് ആണ്ടോടാണ്ട് പെറ്റ് കൂട്ടി വീടുകള് നഴ്സറി പരുവമാക്കിയത്... !
ഇവര്ക്ക് വേദനയും പ്രശ്നങ്ങളുമൊന്നുമില്ലേ എന്നത് എന്റെ ഏറെക്കാലത്തെ സംശയമായിരുന്നു.


സംഭവം ഇതാണു..

രണ്ടാമത്തെ പ്രസവത്തില് വേദന 60-70 ശതമാനം ആയി കുറയും. അങ്ങനെ ഒരു പത്താമത്തെ പിള്ള ആകുമ്പോഴേക്കും കാര്യം സ്മൂത്ത് ആകുമെന്നും പെണ്ണുങ്ങള് പാട്ടും പാടി പ്രസവിക്കുമെന്നുമാണു വിദഗ്ദ മതം ( വിദഗ്ദ ആരെന്ന് വെളിപ്പെടുത്തുന്നില്ല ! )

പേറിനെ പറ്റി ഒരു ഖണ്ടിക ഉപന്യസിച്ചത് എന്റെ ' കൈപൊട്ടല്' സീരീസിനെകുറിച്ചും അതിന്റെ ഉപ കഥകളെക്കുറിച്ചും ഏതാണ്ടൊരു ധാരണ ക്ഷമ അത്രക്കൊന്നും ഉണ്ടാകാന് സാധ്യത ഇല്ലാത്ത നിങ്ങള്ക്ക് കിട്ടാന് വേണ്ടിയാകുന്നു..

ഒരു തരം വക്കു പൊട്ടിയ ഉപമ അല്ലേ ??

ഞാന് ഈ ടൈപ് ചെയ്യുന്ന വലത് കൈ 5 കൊല്ലങ്ങള്ക്കിടയില് 4 തവണ പൊട്ടിയിട്ടുണ്ട് ! അതന്നെ കാര്യം !

എല്ലാം അവധിക്കാലത്താണു.
മൂന്നു തവണ വയനാറ്റില് നിന്നും, ഒരു തവണ കോഴിക്കോട്ടു നിന്നും.

ആദ്യം വീടിന്റെ ഇത്തിരി ഉയര്ന്ന ചേരിയില് നിന്നും മുറ്റത്തേക്ക് വീണു കൈ പൊട്ടി.

അടുത്ത തവണ പേപ്പര് ബോയ് ആയിരുന്ന കുഞ്ഞമ്മാവനെ ' ഹെല്പ്പി ' കിട്ടിയ് സമ്മാനം.  മരം കോച്ചുന്ന തണുപ്പത്ത് ( വെറുതെ ഒരു രസത്തിനു പറയുന്നതല്ല, മരം ശരിക്കും കോച്ചും ! ) മഴ പോലെ പെയ്യുന്ന മഞ്ഞില് കൂടെ അമ്മാവന് ഏതാണ്ടൊരു ധാരണ വച്ച് സൈക്കിള് ഓടിക്കവേ അതൊരു ഗട്ടറിലും ഞാന് അടുത്തുള്ള വയലിലും വീണു.
 മൂന്നാമത്തെ തവണ അഞ്ചു പത്ത് അടി താഴെ തോട്ടില് അലക്കുന്ന അമ്മയേയും കാത്ത് കമാനത്തിന്റെ മുകളില് ഇരുന്ന് തോട്ടിലേക്ക് കാലും നീട്ടി തവളകളെ കല്ലെറിഞ്ഞ് രസിക്കവെ ചക്കയിട്ട പോലെ തോട്ടിലേക്ക് വീണു.
നാലാമത്തെ പൊട്ടല് ഒരല്പ്പം വ്യത്യസ്തമാകുന്നു. ഗുരുവിനെ വന്ദിക്കാന് കാണിച്ച ശുഷ്കാന്തിയുടെ ഫലമായിട്ട് !!

കാരയാട്ടെ കളരിയില് കൂടെയുള്ളവരെല്ലാം സ്ഥലം വിട്ടപ്പോഴും ' ചടിത്തിരിഞ്ഞ് കുമ്പിട്ട് വീണു ' ഗുരുക്കളെ പ്രണമിക്കാന് കാണിച്ച് കൂട്ടിയ അഭ്യാസം ഓവറായി. അടിതെറ്റി, പണികിട്ടി, കൈ പൊട്ടി. !

ഇതാണു ആ പൊട്ടല് ചരിത്രം !

പക്ഷെ, അനുബന്ധമായി ചില രസകരമായ കാര്യങ്ങള് കൂടെ പറയാനുണ്ട്.
ഏതാണ്ട് മൂന്നാമത്തെ കൈ പൊട്ടല് ആയപ്പോഴേക്കും വേദനയെല്ലം കുറഞ്ഞിരുന്നു ( ഒന്നാമത്തെ ഖണ്ടികയിലെ പേറിനെക്കുറിച്ചുള്ള പ്രതിപാദ്യം :) റെഫര് ചെയ്യുക )
ഒരു തവണ പോലും ആശുപത്രിയില് പോയി ' പ്ലാസ്റ്റര് ഇട്ടില്ല' .
ആദ്യ രണ്ട് തവണ കല്പെറ്റയിലെ ചെറിയേക്കനും മൂന്നാമത്തെ തവണ ' ചെറിയേക്കന് സ്മാരക' ഉഴിച്ചില് കേന്ദ്രത്തിലെ ഉഴിച്ചില്കാരും നാലാമത്തെ തവണ സ്വന്തം കളരി ഗുരുക്കളുമാണ് കൈ തൈലമിട്ട് ഉഴിഞ്ഞതും, മുളഞ്ചീന്ത് വച്ച് കെട്ടിയും ശരിപ്പെടുത്തിയത്.

ചെറിയേക്കന്റെ ഉഴിച്ചില് ഇപ്പോഴും മനസ്സിലുണ്ട്. തൈലമിട്ട്, തള്ളവിരല് അമര്ത്തി, ഞെക്കി ഒരു തടവലുണ്ട് ! കണ്ണില് നനവു പടരുമെങ്കിലും അതൊരു ലഹരിയുള്ള വേദനയായിരുന്നു..

വസ്ത്രാക്ഷേപ സമയത്തെ പാഞ്ചാലിയുടെ സാരി പോലത്തെ ഒരു തുണിയുണ്ട്. ഉഴിച്ചില് കഴിഞ്ഞ ഉടനെ കൈത്തണ്ടയുടെ രണ്ട് ഭാഗത്തും മുളക്കഷണങ്ങള് ചേര്ത്ത് വച്ച് ഈ തുണി ചുരുട്ടിക്കെട്ടും. എന്നിട്ട് വേറൊരു തുണി വട്ടത്തില് മാല പോലെ കെട്ടി കൈ കോര്ത്ത് കഴുത്തില് തൂക്കും..

ഈ പതിവു പരിപാടി കഴിഞ്ഞുള്ള മടക്കയാത്രകളാണു എന്റെ ജീവിതത്തിലെ ഏറ്റവും സന്തോഷകരമായ മടക്കയാത്രകള് !
അത് ശശിയമ്മാവനോ കുഞ്ഞമ്മാവനോടൊപ്പമോ ആയിരിക്കും. ഹോട്ടല് ഗ്രീന് ലാന്റില് നിന്നും കറുമുറാ മൊരിയുന്ന ഇളം ചൂടുള്ള പൊറോട്ടയും നല്ല കൊഴുത്ത മഞ്ഞ നിറത്തിലുള്ള മുട്ടക്കറിയും !
പിന്നെ രണ്ട് പുസ്തകങ്ങള് നിര്ബന്ധം.
അതിലൊന്ന് ബാലരമയോ, ബാലമംഗളമോ, പൂമ്പാറ്റയോ ആയിരിക്കും. മറ്റേത് മുഴുനീള ചിത്രകഥ. ഒന്നുകില് ജമ്പോ, അല്ലെങ്കില് മാന്ത്രികനായ മാന്ഡ്രേക്, ഫാന്റം, സീമാന്...

ഓരോ മൂന്നു ദിവസങ്ങള് കൂടുമ്പോഴും ഇതേ പ്രക്രിയ ആവര്ത്തിക്കും. പുതിയ പുസ്തകങ്ങള്ക്കും, ലഹരി നിറഞ്ഞ ആ വേദനയ്ക്കുമായി കല്പെറ്റ പോകാന് തിടുക്കം കൂട്ടും..

കാരയാട്ടെ കളരി സംഘത്തെ കുറിച്ച് കൂടെ പറഞ്ഞ് ഈ പായാരം ഉപ 'സംഹരിക്കാം'

നാലഞ്ചടി ആഴവും, ഒരു ടെന്നീസ് കോര്ട്ടിന്റെ വലിപ്പവുമുള്ള കുഴി. ഓല മേഞ്ഞ മേല്ക്കൂര.
ഒരു മൂലയില് ദൈവങ്ങള്, കുറുവടികള്, വലിയ വടികള്, ഒറ്റക്കോല്, തുരുമ്പിച്ച വാള്, പരിച , ഉറുമി ഇത്യാദികളായ മാരകായുധങ്ങളും കുറെ നിലവിളക്കുകളും.
എരമംഗലം സ്കൂളില് ആറില് പടിക്കുമ്പോഴാണു ഇതെല്ലാം.

പുലര്ച്ചെ നാലു മണിക്കെഴുന്നേറ്റ് പല്ലു തേപ്പ് കഴിഞ്ഞ്, കക്കൂസ്സില് പോയി വന്ന്, കട്ടഞ്ചായ കുടിച്ച് ദേഹമാസകലം എണ്ണയിട്ട് മിനുക്കി തോര്ത്ത് മുണ്ടുടുത്ത് ടോര്ച്ചുമെടുത്തിറങ്ങും. സബിലും, ജിനീഷും, ഭതീഷും റോടില് കാത്തു നില്ക്കുന്നുണ്ടാകും. ( കക്കൂസില് പോകുന്ന കാര്യം കേള്ക്കാന് അത്ര സുഗന്ധമുള്ള കാര്യമല്ലെങ്കിലും  മനപൂര്‍വം തന്നെ എഴുതിയതാണു. കാരണം ഈ പ്രക്രിയക്ക് സമയം കിട്ടാതെ കളരിയിലെത്തിയ വിദ്വാന് ഗുരുക്കള് സൂചിക്കിരുത്താന് പിടിച്ച് അമര്ത്തിയപ്പോള് അപ്പിയിട്ട് പോയതിനു ഈ ഞാന് സാക്ഷിയാണു ! - കാലുകള് രണ്ടും തറയ്ക്ക് സമാന്തരമായി ഒട്ടിച്ച് ഇരിക്കുന്ന ഏര്പ്പാടാണു സൂചിക്കിരിക്കല്. ഏതാണ്ട് ഇംഗ്ലീഷിലെ ' ടി' എന്ന അക്ഷരം തല തിരിച്ച് വച്ച പോലെ ഉണ്ടാകും ഈ പരിപാടിയുടെ നേരത്ത് അഭ്യാസി.

അന്ന് ഏറ്റവും നന്നായി സൂചിക്കിരുന്നത് കീര്ത്തിയും, സദാനന്ദേട്ടനുമായിരുന്നു. സദാനന്ദേട്ടന് അന്നേ ' കരാട്ടേക്കാരന്' ആയിരുന്നുവെന്ന് സൂചിക്കിരിക്കാന് മുക്കി മുക്കി കളിക്കുന്ന അസൂയാലുക്കള് പരക്കെ അഭിപ്രായപ്പെട്ടിരുന്നു.

കളരി നില്ക്കുന്ന സ്ഥലത്തിന്റെ ഉടമയുടെ മക്കളായ ശ്രുതിക്കും, കീര്ത്തിക്കും കളരിയിലെ സകല കുറുക്കന്മാരുടെയും സവിശേഷ 'ശ്രദ്ധ' കിട്ടിയിരുന്നു.

ഏതായാലും നാലാമത്തെ കൈ പൊട്ടലോടെ അഭ്യാസം നിന്നു. എങ്കിലും കൈയില് അരച്ചു പുരട്ടാന് എവിടുന്നോ സംഘടിപ്പിച്ച മൂവിലപ്പെരിയിലയുമായി എന്റെ ഓലപ്പുരയും തേടിപ്പിടിച്ച്, ചേനികണ്ടിയിലെ പറമ്പിലൂടെ മണ്പടിയും കയറി ആലയുടെ അരിക് ചേര്ന്ന് വെളുക്കെ ചിരിച്ച് കൊണ്ട് കയറി വന്ന ഗുരുക്കളുടെ ചിത്രം മാഞ്ഞു പോകുന്നില്ല. നസീറിന്റെ പോലത്തെ നേര്ത്ത മീശയുണ്ടായിരുന്നു അദ്ധേഹത്തിനു..

Sunday, March 13, 2011

വിശ്വ വിഖ്യാതമായ ബെറ്റ്‌

രാമനാഥന്‍ മാഷ്‌ പ്രമാണിയായിരുന്നു, സുന്ദരന്‍ ആയിരുന്നു, സുമുഖന്‍ ആയിരുന്നു, ആരോഗ്യവാന്‍ ആയിരുന്നു, സെക്സി ആയിരുന്നു ( ഇതിന്റെ മലയാളം പദം തപ്പിയിട്ട്‌ കിട്ടിയില്ല )


പുരാണങ്ങളിലെ സകല വീര കോമളന്‍മാരെയും പോലെ രാമന്‍ മാഷിനും ദൌര്‍ബല്യങ്ങള്‍ ഏറെ ഉണ്ടായിരുന്നതായി കേട്ടിട്ടുണ്ട്‌.



( ദൌര്‍ബല്യങ്ങളുടെ കാര്യത്തില്‍ മാഷന്‍മാര്‍ ഒരു പടി എന്നും മുന്നില്‍ ആയിരുന്നു എന്നതിനു സോളിഡ്‌ എവിഡെന്‍സുകള്‍ എന്റെ കൈയില്‍ ഉണ്ട്‌.അതിലൊന്നണു ഭാസ്കരന്‍ മാഷിന്റെ കഥ. ചെസ്സ്‌ കളിച്ച്‌ കാര്‍ വാങ്ങി. ചെസ്സ്‌ കളിച്ച്‌ വീട്‌ വിറ്റു. മതം നോക്കാതെ അങ്ങേരുടെ കൂടെ ഇറങ്ങിപ്പോന്നവളായിരുന്നു ത്രേസ്യാമ്മ ടീച്ചര്‍. ഭാസ്കരന്‍ മഷ്‌ കാട്ടിക്കൂട്ടുന്ന തോന്നിവാസങ്ങള്‍ ഒക്കെ ത്രെസ്യാമ്മ ടീച്ചെറിന്റെ മനശ്ശുദ്ധിക്കു മുന്‍പില്‍ നാട്ടുകാര്‍ മറന്നു കളഞ്ഞു. അകാലത്തില്‍ ആ സ്ത്രീരത്നം കാലപുരി പൂകിയപ്പോള്‍ ഭാസ്കരന്‍ മാഷ്‌ വേറൊരു പ്രണയിനിയെയും കൂട്ടി വീട്ടില്‍ വന്നു. ത്രേസ്സ്യാമ്മ ടീച്ചെറിന്റെ കുഴിമാടത്തിലെ മണ്ണുണങ്ങിയിട്ട്‌ പോലുമൂണ്ടായിരുന്നില്ല അപ്പോള്‍.)



പറഞ്ഞു വന്നത്‌ രാമനാഥന്‍ മാഷെ പറ്റിയാണു. ഇദ്ദേഹത്തിന്റെ ദൌര്‍ബല്യമായിരുന്നു ' ബെറ്റ്‌' വയ്ക്കല്‍ എന്ന് കേട്ടിട്ടുണ്ട്‌.

ചുമ്മ ബെറ്റ്‌ വച്ച്‌ തടി തപ്പല്‍ അല്ല. കാശ്‌ മാഷിന്റെ കീശയില്‍ കിടക്കും.

അത്തരമൊരു വിശ്വ വിഖ്യാതമായ ബെറ്റിന്റെ കഥയാണു ഞാന്‍ പറഞ്ഞ്‌ വരുന്നത്‌. സംഭവം സത്യമാണൊ എന്നത്‌ രാമനാഥന്‍ മാഷിനു മാത്രം അറിയാം.



കണാരേട്ടനും, കാദര്‍ക്കായും, മിലിട്രി നമ്പ്യാരും ഒക്കെ സന്നിഹിതരായ പ്രൌഡ സദസ്സ്‌.

മധുസേവ പൊടി പൊടിക്കുന്നു.

നിലാവിന്റെ നീല വെട്ടത്തില്‍ മില്‍ട്രിയുടെയും, കാദര്‍ക്കായുടെയും കഷണ്ടികള്‍ മിന്നിത്തിളങ്ങി.

നാലാമത്തെ ഔണ്‍സ്‌ ചെലുത്തിയപ്പോള്‍ രാമനാഥന്‍ മാഷിന്റെ നരച്ച തലയില്‍ ഒരു നാല്‍പ്പതിന്റെ ബള്‍ബ്‌ മിന്നി.

" ബെറ്റ്‌ "

മില്‍ട്രിയും കണാരേട്ടനും പരസ്പരം നോക്കി. അതെ, രാമനാഥന്‍ മാഷ്‌ എന്തോ ബെറ്റ്‌ പ്രഖ്യാപിക്കുകയാണു. ! ഒരു വിധം മനുഷ്യ സാധ്യമായ കാര്യങ്ങള്‍ക്കൊന്നും അങ്ങേരോട്‌ ബെറ്റ്‌ വച്ചു കൂടായെന്ന്‌ ആ സഹ കുടിയന്‍മാര്‍ക്ക്‌ നന്നായറിയാം.

പക്ഷെ ബജറ്റ്‌ പ്രഖ്യാപനം ഛെ ബെറ്റ്‌ പ്രഖ്യാപനം വന്നപ്പോള്‍ വേറൊരു അറുപതിന്റെ ബള്‍ബ്‌ മിന്നി, മില്‍ട്രിയുടെ തലയില്‍ !

മില്‍ട്രി നമ്പ്യാര്‍ എണീറ്റ്‌ എളിക്ക്‌ കൈ കുത്തി വെല്ലു വിളിച്ചു.



" രാമാ, ഇങ്ങി അപ്പറഞ്ഞത്‌ ചെയ്താ അയ്യായിരം ഉറുപ്പിയ ദാ ഇക്കണാരനും കാദറും സാക്ഷ്യേളായിറ്റ്‌ എണക്ക്‌ ഞാന്‍ തരും. "



മില്‍ട്രി നാവ്‌ അകത്തേക്ക്‌ വലിച്ചിടും മുന്‍പ്‌ രാമനാഥന്‍ മാഷ്‌ അഞ്ചാമത്തെ ഔണ്‍സും അടിച്ച്‌ എണീറ്റ്‌ കനാലിന്റെ വക്കില്‍ പോയിരുന്നു. ഇലാസ്റ്റിക്‌ ജെട്ടി വലിച്ച്‌ നിരക്കിയൂരി മുണ്ട്‌ പൊക്കി തോളറ്റം വരെ പിടിച്ച്‌ ഒറ്റ ഇരുത്തം. ആര്‍ക്കെങ്കിലും എന്തെങ്കിലും പറയാന്‍ കഴിയും മുന്‍പ്‌ വിസര്‍ജനം കഴിഞ്ഞു. സദസ്സ്‌ വാ പൊളിച്ചിരിക്കെ തിരിഞ്ഞ്‌ നിന്ന് രാമനാഥന്‍ മാഷ്‌ സ്വന്തം അപ്പി ' ചൂടോടെ ' ഒരു പിടി വാരി വായിലിട്ടു. മില്‍ട്രി നെഞ്ചത്തും ബാക്കിയുള്ളവര്‍ മൂക്കത്തും കൈ വച്ചു.



പതിവുപോലെ രാമനാഥന്‍ മാഷ്‌ ജയിച്ചു. കാലം കടന്നു പോയപ്പോള്‍ കാഞ്ഞിക്കാവിലെ സാമൂഹ്യ നിരീക്ഷകര്‍ സംഭവത്തെ രണ്ടായി വ്യാഖ്യാനിച്ചു.

1. ഏേത്‌ പ്രതിസന്ധികളെയും തരണം ചെയ്ത്‌ എന്ത്‌ വിലയും കൊടുത്ത്‌ പറഞ്ഞ വാക്ക്‌ പാലിക്കാനുള്ള

രാമനാഥന്‍ മാഷിന്റെ തന്റേടം.

2.ഡോക്ടര്‍ ആയാലും, അദ്ധ്യാപകന്‍ ആയാലും ' രണ്ടെണ്ണം വീശിയാല്‍ ' എന്തു കോപ്രായവും കാട്ടിക്കൂട്ടാന്‍ ധൈര്യം കാണിക്കുന്ന ആളുകളുടെ ഒരു അന്തര്‍ലീന പ്രവണത.

Friday, March 11, 2011

ഒരു ' മരണപ്പായാരം '

മൂത്തമ്മയുടെ ബന്ധു മരിച്ചു.


ഇത്തിരി ദൂരെയാണു.

കോഫീ ഹൌസ്സിലെ സഖാവ്‌ ഭതീഷിന്റെ സ്കൂട്ടര്‍ വാങ്ങിയാണ്‍ പോയത്‌. മൂത്തച്ചനുമുണ്ട്‌.

നട്ടപ്പാതിര !

താമരശ്ശേരി കൊയിലാണ്ടി റോഡില്‍ പുട്ടില്‍ തേങ്ങ തിരുകും പോലെ ഇട്ടിരിക്കുന്ന ഹമ്പുകള്‍ ഓരോന്നു കയറുമ്പോഴും മൂത്തച്ചന്‍ ചുമച്ച്‌ കൊണ്ടിരുനു.

( ഒരു പുരുഷായുസ്സില്‍ കുടിച്ചാല്‍ തീരാത്ത അത്രയും ചാരായം കുടിച്ച്‌ കുടിച്ച്‌, മിനുറ്റിനു മിനുറ്റ്‌ ബീഡി വലിച്ചു തള്ളി 25 കൊല്ലം മുന്‍പ്‌ സൈഡ്‌ ആയതയിരുന്നു പുള്ളി.

മേരിക്കുന്ന്‌ ആശുപത്രിയില്‍ രക്തം നിറഞ്ഞ കഫം തുപ്പി നാളുകള്‍ എണ്ണി കഴിഞ്ഞു, മാസങ്ങള്‍..

അനിയന്‍ അതായത്‌ എന്റെ അച്ഛന്‍ ഊണും ഉറക്കവും ഇല്ലാതെ കൂടെ കഴിഞ്ഞു. ഒടുവില്‍ എല്ലാവരുടെയും കണക്ക്‌ കൂട്ടലുകള്‍ തെറ്റിച്ച്‌ മൂത്തച്ചന്‍ ഉയിര്‍തെണീറ്റു.)

12.45 കഴിഞ്ഞു അവിടെ എത്താന്‍.

കറണ്ട്‌ പോലും എത്തിയിട്ടില്ലാത്ത ആ കുഞ്ഞു വീട്ടില്‍ ആളുകള്‍ എത്തുന്നേ ഉള്ളു.സ്ഥലത്തെ കോണ്‍ഗ്രസ്സ്‌ കമ്മറ്റിയുടെയും, ഒരു ജനശ്രീയുടെയും രണ്ട്‌ കുടുംബശ്രീകളുടെയുമായി നാലു റീത്തുകള്‍ അടുക്കള വശത്ത്‌ പാത്രം കഴുകുന്ന വാഴച്ചോട്ടില്‍ ചാരി വച്ചിരിക്കുന്നു.

നാലു റീത്തുകളിലെയും കൈയക്ഷരങ്ങള്‍ ഒരേ പോലെ ഇരിക്കുന്നു. ഒരേ കടയില്‍ നിന്നും വാങ്ങിയതായിരിക്കണംണാട്ടിലെ മരണങ്ങള്‍ ആ പൂക്കച്ചവടക്കാരനു ഭാഗ്യം എത്തിക്കുന്നു.!

ദൂരെ വയലിനക്കരെ ആംബുലന്‍സിന്റെ ബീക്കണ്‍ ലൈറ്റ്‌ തെളിഞ്ഞ്‌ കണ്ടു.

സ്റ്റ്രെച്ചറില്‍ നിന്നും മ്രിത ശരീരം പായിലേക്ക്‌ മാറ്റി.എവിടുന്നൊക്കെയോ ആരൊക്കെയോ കയറി വന്നു..വരിയായി മാറിയ ആള്‍ക്കൂട്ടം ക്ഷമയോടെ ചലിച്ചു കൊണ്ടിരുനു.

അകത്തു നിന്നും ഇറങ്ങി വന്ന പൂച്ച ആളുകളെ ഗൌനിക്കാതെ മുറ്റത്തേക്കിറങ്ങി ചവിട്ടു കല്ലിന്‍മേല്‍ പോയിരുന്ന്‌ കാലുയര്‍ത്തി സ്വന്തം തുടകള്‍ നക്കി വ്രിത്തിയാക്കി.

പെട്ടെന്നാണു ആ കരച്ചില്‍ കേട്ടത്‌. പത്തു മുപ്പത്തഞ്ച്‌ കൊല്ലത്തെ കഥകള്‍ ഒരു പദ്യത്തിന്റെ രൂപത്തില്‍ ഈണത്തില്‍ കരഞ്ഞും കൊണ്ട്‌ ആ സ്ത്രീ ബന്ധുക്കളോടൊപ്പം വന്നു കയറി.

വരി മുറിഞ്ഞ്‌ ആള്‍ക്കൂട്ടമായി. എല്ലാവരും ആ സ്ത്രീക്കു ചുറ്റുമായി. അവര്‍ ഒരു കൈ മരിച്ചയാളിന്റെ ദെഹത്തു വച്ച്‌ മറ്റേ കൈ കൊണ്ട്‌ മൂക്ക്‌ പിഴിഞ്ഞു. പൊടുന്നനെ എന്തോ ഓര്‍ത്ത്‌ അവര്‍ തല പൊക്കി. ഒരു കുതിപ്പിനു എണീറ്റ്‌ മുറ്റത്തേക്ക്‌ ഇറങ്ങി. കൂട്ടിയിട്ടിരിക്കുന്ന അനേകം ചെരിപ്പുകള്‍ക്കിടയില്‍ നിന്ന് സ്വന്തം ഒരു ജോടി ചെരിപ്പുകള്‍ കണ്ടു പിടിച്ച്‌ കൈയിലെടുത്ത്‌ സുരക്ഷിതമായ മറ്റൊരു മൂലയിലേക്ക്‌ മാറ്റി വച്ചു.എന്നിട്ട്‌ വീണ്ടും കോലായിലേക്ക്‌ കയറിപ്പോയി.

Wednesday, January 12, 2011

വീണ്ടും ചില പാരലല്‍ വിശേഷങ്ങള്‍..

പാരലെല്‍ കോളേജിന്റെ പടിയിറങ്ങിയിട്ട്‌ ജനുവരിയില്‍ എട്ടു മാസം തികയുകയാണു..
എന്റെ കഞ്ഞിയും, പയറും,ബീഫ്‌ ഫ്രൈയുമൊക്കെ ആയിരുന്നു ക്രൈസ്റ്റും, ഗാലക്സിയും, ഇന്‍സൈറ്റും,കാമ്പസ്സുമൊക്കെ..
എന്തൊക്കെയോ കാണിച്ച്‌ കൂട്ടി.. എപ്പോഴൊക്കെയോ മുടിഞ്ഞ ആത്മാര്‍ത്ഥത കാണിച്ചു..ചിലപ്പോഴൊക്കെ അങ്ങേയറ്റം അലംഭാവം കാണിച്ചു..

ഓര്‍ത്തെടുക്കാന്‍ ഒരു ചാക്ക്‌ അനുഭവങ്ങള്‍ ഓരോ കോളേജില്‍ നിന്നും കിട്ടി..അതില്‍ വിശപ്പിന്റെ ചൂടുള്ളതും, ചിരിയുടെ കൊലുസ്സുള്ളതും, ചര്‍ദ്ദിലിന്റെ പുളിപ്പുള്ളതുമായ കഥകളുണ്ട്‌..
അക്കൂട്ടാത്തില്‍ ' കണ്ണീര്‍ക്കഥകള്‍' ഞാനങ്ങ്‌ നിര്‍ത്തി..( ഗുരുവായൂരപ്പന്‍ കോളേജിലെ ഒരു നല്ല കൂട്ടുകാരി ആയിരുന്ന രേഷ്മ - ഇപ്പോള്‍ രേഷ്മാ പ്രവിത്ത്‌, കഴിഞ്ഞ 'പാരലെല്‍ പോസ്റ്റ്‌ ' വായിച്ച്‌ ഓണ്‍ ലൈന്‍ ആയി എന്റെ വേളക്ക്‌ പിടിച്ചു..അതില്‍ ബസ്സിനു പൈസയില്ലാതെ പേരാമ്പ്രയിലെ വാച്ചു പീടികകളില്‍ എന്റെ പൊട്ട വാച്ച്‌ വില്‍ക്കാന്‍ കയറിയ കാര്യം നിരത്തിയിരുന്നു..അതിലൊരു വാച്ച്‌ കട അവളുടെതായിരുന്നത്രെ !! ഇനി അതു പോലത്തെ പോസ്റ്റുകള്‍ എഴുതി അവളെ കരയിപ്പിച്ചാല്‍ അവള്‍ അവളുടെ തന്നെ സിസ്റ്റെം തല്ലിപ്പൊട്ടിക്കുമെന്ന് ഒരു വാണിംഗ്‌ തന്നിട്ടുണ്ട്‌ :) )


ഹിസ്റ്ററിയും, ഷാജഹാനും, കള്ളുഷാപ്പും, അപ്പുക്കുട്ടി നായരും തമ്മില്‍ എന്താണു..???
കണ്ണ്‍ തള്ളണ്ട.. ബന്ധം ഉണ്ട്‌..അതു പറയാം..അതു വരുത്തി വച്ച പുകിലും..
ഹിസ്റ്റെറിയുടെ രാജന്‍ മാഷെ ഒന്നു ഹെല്‍പ്‌ ചെയ്തതാണു..അല്ലെങ്കിലും ഞാന്‍ വെറും ഔട്ട്‌ ഓഫ്‌ സിലബസ്സ്‌ ആയിരുന്നെന്ന് ഒരുപാട്‌ പടിപ്പിസ്റ്റുകള്‍ പരാതിപ്പെട്ടിട്ടുണ്ട്‌..
സംഭവം പറയാം..
പത്താം ക്ലാസ്സിലെ കുട്ടികള്‍ക്ക്‌ മുഗള്‍ രാജാക്കന്‍മാരെ ക്രമത്തില്‍ ഓര്‍ക്കണം..പി.എസ്‌.സി, പുഴുക്കള്‍ ഉപയോഗിക്കുന്ന കുറേ സൂത്ര വാക്യങ്ങള്‍ ഉണ്ട്‌..അത്‌ ഞാന്‍ വിട്ടു.ഒരു മണിക്കൂര്‍ തല പുകച്ച്‌ ഞാനൊരു സൂത്രവാക്ക്യമുണാക്കി.
അത്‌ ഇപ്രകാരമാകുന്നു..

                             ബാലന്‍ നമ്പ്യാരെയും
                            അപ്പുക്കുട്ടി നായരെയും,
                            ഹുസൈനിനെയും.
                            ജനങ്ങള്‍
                           ഷാപ്പില്‍ നിന്നും
                           ഔട്ട്‌ ആക്കി !

സംഭവം ഹിറ്റ്‌ ആയി.. കുമാരി കുമാരന്‍മാര്‍ ആ ' കവിതാ ശകലം ' നോട്ടിന്റെയും, ടെക്സ്റ്റിന്റെയുമെല്ലാം ചട്ടയിലും, പേജിലുമൊക്കെ കുറിച്ചെടുത്തു..
ഇനി ഞാന്‍ അത്‌ വിവരിക്കാം.
മേല്‍പ്പറഞ്ഞ കവിത ഇങ്ങനെ ഓര്‍ക്കണം..
ബാലന്‍ നമ്പിയാര്‍ = ബാബര്‍
അപ്പുക്കുട്ടി നായര്‍ = അക്ബര്‍
ഹുസൈന്‍ = ഹുമയൂണ്‍
ജനങ്ങള്‍ = ജഹംഗീര്‍
ഷാപ്‌ = ഷാജഹാന്‍
ഔട്ട്‌ = ഔറംഗസീബ്‌

( ശാസ്ത്രീയമായി വിശകലനം ചെയ്താല്‍ ഷാപ്പിനെ ഷാജഹാനോട്‌ തലക്കകത്ത്‌ ആള്‍വാസം ഉള്ളവര്‍ താരതമ്യപ്പെടുത്തില്ല )
പക്ഷെ കുട്ടികള്‍ പടിച്ചു.. പാട്ടാകുകയും ചെയ്തു..
പക്ഷെ പത്താം ക്ലാസ്സില്‍ ഞാന്‍ ഘോര ഘോരം പ്രസ്തുത കവിത ' ചമയ്ക്കുമ്പോള്‍ ' ഒന്‍പതാം ക്ലാസ്സിലെ അമിട്ടു പോലത്തെ ഒരു പെണ്‍കൊച്ച്‌ കണ്ണ്‍ അവിടത്തെ ബോര്‍ഡിലും കാത്‌ ഇവിടത്തെ ക്ലാസ്സിലുമായി ഇരിപ്പുണ്ടയിരുന്നു..!!!
എന്റെ ഹിസ്റ്ററിക്കവിതയിലെ നായകനായ അപ്പുക്കുട്ടി നായരുടെ സ്വന്തം മകള്‍ രമണിയുടെ സ്വന്തം മകള്‍ ശ്രുതി !
ഇന്റെര്‍വെലിനു പുറത്തിറങ്ങി ഓഫീസിലേക്ക്‌ നടക്കുമ്പോള്‍ കായംകുളം കൊച്ചുണ്ണിയെപ്പോലെ ശ്രുതി വഴിയിലേക്ക്‌ കയറി നിന്നു..
" മാഷ്കിന്നെ മനസ്സിലായോ ? "
മനസ്സിലായില്ലെങ്കിലും പറഞ്ഞു.
" പിന്നേ...എന്തൊക്കെയുണ്ട്‌..? നന്നായി പടിക്കുന്നില്ലേ ? "
അവള്‍ ആരാ മോള്‍..?
" എന്നാല്‍ പറയീ ആരാ??"
കുടുങ്ങി. മാനം രക്ഷിക്കാന്‍ ചോദിച്ചു, അശ്വതി അല്ലെ?
അവള്‍ ഒറ്റച്ചിരി.
എന്റെ മുണ്ട്‌ അഴിഞ്ഞു പോകാതിരിക്കാന്‍ ഞാന്‍ മുറുക്കെ പിടിച്ചു..
" മാഷേ ഞാന്‍ രമണീന്റെ മോളാ..എടക്കോട്ടെ.."
എന്റെ തലയില്‍ ഒരു കൊള്ളിയാല്‍ മിന്നി..
എടക്കോട്ടിലെ രമണി..!
മിന്നല്‍ അടങ്ങി ഇടി വരും മുന്‍പ്‌ അവള്‍ അടുത്ത വെടി പൊട്ടിച്ചു.
" മാഷ്‌ അച്ചാച്ചനെ പറ്റി എന്തൊക്കെയോ പറയുന്നേ കേട്ടിക്കല്ലോ..?"
മനസ്സിലായി..എല്ലാം മനസ്സിലായി.. ഇവള്‍ എടക്കോട്ടിലെ അപ്പുക്കുട്ടി നായരുടെ ഒരേ ഒരു കൊച്ചു മകള്‍ ശ്രുതി !
ഞാന്‍ 19 ാ‍ം അടവ്‌ ആദ്യമെടുത്ത്‌ പ്രയോഗിച്ചു.
ഒരു മുട്ടന്‍ കള്ളത്തരം പറഞ്ഞു..
" ആ അത്‌ ശ്രുതിമോള്‍ ഞാന്‍ ഒരു സാങ്കല്‍പ്പിക കവിത പാടിയതല്ലേ..? "
ശ്രുതി വിടുന്നില്ല..അവളുടെ ശ്രുതി അല്‍പ്പം അപശ്രുതി ആയ പോലെ എനിക്ക്‌ തോന്നി..
" ന്നിറ്റിങ്ങളു ബാലന്‍ നമ്പിയാരേം പറ്റീം പാടീക്കല്ലോ..? അച്ചച്ചന്റെ ബെസ്റ്റ്‌ ഫ്രെണ്ടല്ലേ നമ്പിയാരു വല്യച്ചന്‍..?

( വാസ്തവം.! എന്റെ വിവാദ കവിതയിലെ എല്ലാ കഥാപാത്രങ്ങളും യഥാര്‍ത്ഥങ്ങളാണ്‍..അതില്‍ ഹുമയൂണ്‍ ക്ഷമിക്കണം ഹുസൈന്‍ മാത്രമെ കള്ളു കുടിക്കാത്തതുള്ളൂ..)
ഒടുവില്‍ ഞാന്‍ കീഴടങ്ങി.
ഒരു വിധത്തില്‍ അവളെ പറഞ്ഞു മനസ്സിലാക്കി.. തടിയൂരി..
പക്ഷെ വൈകുന്നേരം അവള്‍ വീട്ടിലേക്ക്‌ പോയത്‌ എന്റെ മനസ്സിലേക്ക്‌ ഒരു ബക്കറ്റ്‌ തീ കോരിയിട്ടാണു..
വര്‍ക്ക്‌ ഷോപ്പിന്റെ മുന്നില്‍ നിന്ന്‌ ഒന്നാം നിലയിലെ ഓഫീസിലേക്ക്‌ നോക്കി ശ്രുതി ഒരു വിരട്ടല്‍.
" മാഷേ ഞാന്‍ അച്ചാച്ചനോട്‌ പറഞ്ഞു കൊടുക്കും "
ടെന്‍ഷന്‍ തീര്‍ക്കാന്‍ അന്നു രണ്ട്‌ വിത്സ്‌ വാങ്ങി വലിച്ചു..
പിറ്റേന്ന്‌ വൈകുന്നേരം പറമ്പിന്‍ മുകളിലെ കയറ്റം വലിഞ്ഞു കയറുമ്പോള്‍ ആകാശത്തു നിന്ന്‌ പൊട്ടി വീണ പോലെ എതിരേ വരുന്നു അപ്പുക്കുട്ടി നായര്‍ !!
തീര്‍ന്നില്ല നായരുടെ എന്തൊ ഒരു കവര്‍ തൂക്കിപ്പിടിച്ചും കൊണ്ട്‌ ശ്രുതിയും..
മനസ്സില്‍ നാമം ജപിച്ചു കൊണ്ട്‌ അങ്ങേരെ കടന്ന്‌ അപ്പുറമെത്തി...
പൊടുന്നനെ ഒരു വിളി..
" ഇങ്ങി ഗംഗന്റെ മോനല്ലേ..? ആടെ നിക്ക്‌.."
ഭൂമി പിളര്‍ന്ന്‌ സീതയെ കൂട്ടികൊണ്ട്‌ പോയ പോലെ എന്നെയും കൊണ്ട്‌ പോകാന്‍ ആഗ്രഹിച്ചു പോയി..
മോഷ്ടിച്ച വാഴക്കുലയുമായി ജന്‍മിക്ക്‌ മുന്നില്‍ ചെന്നുപെട്ട കുടിയാനെപ്പോലെ തല കുനിച്ചു നിന്നു..
അപ്പോള്‍ അപ്പുക്കുട്ടി നായര്‍ ഒന്നുകൂടെ അടുത്തേക്ക്‌ വന്നു. മുണ്ടിന്റെ കുത്തഴിച്ച്‌ നായര്‍ ഒന്നുകൂടെ പൊക്കി മടക്കി കുത്തി. ഞാന്‍ ഉറപ്പിച്ചു. അടി വീണു..
അപ്പുക്കുട്ടി നായര്‍ ഉറക്കെ ചോദിച്ചു..
" സമയെത്ത്രായി..? ഇന്റെ വാച്ച്‌ ഉച്ചക്ക്‌ നിന്നു പോയി.."
എന്നിട്ട്‌ സ്വന്തം വാച്ചിനു രണ്ട്‌ കൊട്ട്‌..
" ആറു മണി.."
പറഞ്ഞത്‌ ഞാന്‍ ആണെങ്കിലും വരണ്ട തൊണ്ടയില്‍ നിന്നും പുറത്തു വന്നത്‌ ഒരു സ്ത്രീ ശബ്ദമാണു
കാഴ്ച കമ്മിയായ നായര്‍ ഏതാണാ പെണ്ണെന്ന്‌ അറിയാന്‍ എന്റെ പിന്നിലേക്ക്‌ നോക്കി. ഞാന്‍ മുരടനക്ക്‌
വീണ്ടും പറഞ്ഞു..
" അപ്പൂട്ടിയാരെ ആറു മണി കഴിഞ്ഞു.."
ക്ലാസ്സില്‍ സിംഹമായ മാഷ്‌ അച്ചാചന്റെ മുന്നില്‍ വളഞ്ഞ്‌ കുത്തി നിന്ന് വിറക്കുന്നത്‌ കണ്ട്‌ ഉണ്ടക്കണ്ണുകള്‍ 90 ഡിഗ്രി മേലോട്ടുയര്‍ത്തി ഒരു കൈയില്‍ കവറും തൂക്കി മറ്റേ കൈ കൊണ്ട്‌ പ്രിഷ്ട്ടത്തില്‍ ചൊറിഞ്ഞും കൊണ്ട്‌ ശ്രുതി നില്‍ക്കുന്നു.
പോട്ടെയെന്നും പറഞ്ഞ്‌ നടന്നു.. അടുത്ത വളവ്‌ തിരിയാന്‍ തുടങ്ങുമ്പോള്‍ വെറുതെയൊന്ന് തിരിഞ്ഞ്‌ നോക്കി..
ആ മൈക്രോ നിമിഷത്തില്‍ തന്നെ ശ്രുതിയും തിരിഞ്ഞ്‌ നോക്കി.
അപ്പോള്‍ അവള്‍ ചിരിച്ച ആ " ആക്കിച്ചിരി " മരണം വരെ ഞാന്‍ മറക്കില്ല :)